Udalak berak antolatutako autobusek Gobelako udal kiroldegira eraman dituzte, aterpea emateko, Larrañazubi eta Zubileta eskola publikoetako ikasle eta irakasleak, guztira 140 bat lagun. Halaber, Udalak Fadurako kiroldegia zarratzea agindu du, bihar ere itxita egongo da, eta goi mailako kirolaren zentroa ere jendez hustu egin du.
Salsidun bizi diren hamalau lagun herriko hotel batera eraman dituzte bazkaltzera. Era berean Udalak hainbat hotel plaza erreserbatu ditu ostatua beharko luketen pertsonentzat. Getxoko Udalak abiatutako operatiboan ehun lagun inguruk hartzen dute parte, Udaltzaingoa, Ertzaintza, Babes Zibila, Gurutze Gorria, DYA eta udal zerbitzu teknikoetako kideak guztiak.
Premiazko neurriak
Horrez gainera, Imanol Landa alkateak Bozeramaleen Batzordearen premiazko batzarra deitu du egoeraren berri emateko eta bertan alderdi politiko guztiek aho batez erabaki dute Gobela errekari buruzko URAren proiektua aurreratu eta hurrengo Udalbatzara eramatea. Horri esker, bere egunean Uraren Euskal Agentziak aurreratutako neurriak "premiaz hartu ahal" izango dituztela esan dute udal iturriek.
Udalbatza ostiral honetan, hilak 30, egingo da eta urrats hori beharrezkoa denez, Uholdeetako Batzorde Bereziak bere batzarra aurreratuko du Udalbatzara proiektua eraman eta onartu ahal izateko. Batzorde horretan auzokide elkarteek ere hartzen dute parte, Udalean ordezkaritza duten alderdi politikoetako ordezkari guztiekin batera.
Euriteak direla eta alerta goreneko operatiboa indarrean mantenduko du Getxoko Udalak
2009ko urt. 27a, 16:36
Getxo udalerria azken orduetan jasaten ari den euriteak direla eta, Gobernu Taldeak alerta gorenari eutsiko dio eguraldiak eta Gobela errekak berak okerrera eginez gero hartu beharreko neurriak hartu aldera. Izan ere, sortutako larrialdiko egoerari aurre egiteko pasa den goizaldetik badaezpadako neurriak eta ekintzak abiatu dituela esan du Imanol Landa alkateak. Landa, Gobernuko taldekideekin batera, kaltetutako guneak bisitatu ditu eta "alderdi horietako auzokideekin etengabe izan da harremanetan horien eskariei erantzun ahal izateko" udal iturriek zabaldutakoaren arabera. Udalak jakinarazi duenez, gaurko lehen orduetan, Udaltzaingoko agenteek bozgorailuen bitartez ohartarazi dituzte Salsidu, Aldapa, Makaleta eta Elkanoko bizilagunak garajeetatik autoak ateratzeko eskatuz. Ondoren,oliziek eta osasun eta erreskate taldeek, Babes Zibilaren aginduetara, 4 ikastetxe (Getxo I eta Fadura LH Institutuak eta Larrañazubi eta Zubileta herri eskolak) hustu dituzte, baita Akaziak kaleko DYAren Eguneko Zentroa. Bestalde, URA proiektua onartzeko proposamena ostiral honetan eztabaidatuko dute, Udalbatzan. Argazkian, eskuman, Delfi Zubilletako auzokidea. Ekainean, uriolak hondatu zion etxea eta pasa den asteburuan zikloiak bere kioskoa bota zuen. Argazki gehiago ikusteko sakatu hemen.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun