Eguraldiak hobera egingo du bihar
2009ko urt. 27a, 20:13
Euskalmet Euskal Meteorologia Agentziaren iragarpenaren arabera, biharko eguna euripean hasiko dugu, baina arratsalde-gau partean, ordea, ateri eutsiko dio. Goizean, zerua oso hodeitsu egongo da eta euri arina egingo du. Arratsaldean aldiz, mendebaldetik ekialdera atertzen joango da eta ostarteak zabalduko dira. Mendebaldeko haize ahul-bizia ibiliko da. Tenperatura maximoak igo egingo dira eta kostaldean 13 graduren bueltan geratuko dira eta 9-10 gradu inguruan barnealdean. Argazkian, hainbat bizilagun Gobela errekari begira.Itsasoan mendebaldeko haizea ibiliko da 3-4 indarrarekin, eta itsaskirria edo itsaskia eragingo du. Arratsaldean indarra galdu eta 2-3ko indarra hartuko du, itsaso kizkurra edo itsaskirria eraginez. Ipar-mendebaldeko hondoko itsasoak 2 metro inguruko olatuak altxatuko ditu eta arratsaldean 3-3,5 metrora igoko dira. Uraren tenperatura 12 gradukoa da eta ikus-eremua 4 eta 10 kilometro bitartean egongo da. Itsasgorak 4:35ean eta 16:53an izango dira, eta itsasbeherak, 10:45ean eta 22:54an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun