Lamiakoko alokairu sozialeko 58 etxebizitzen giltzak banatu dituzte
2009ko urt. 27a, 21:09
Javier Madrazo Eusko Jaurlaritzaren Etxebizitza sailburuak eta Eneko Arruebarrena Leioako alkateak banatu zituzten atzo, astelehena, Lamiako auzoko errentazko etxebizitza sozialen giltzak. Guztira 58 pisu dira eta horietatik 13 botatako etxeetako bizilagunei ostatu emateko erabiliko dituzte. Visesa Jaurlaritzaren menpeko sozietate publikoak sustatu eta Graizu-Exisa enpresak altxatu ditu, Lamiakoko Langileria kaleko 88 eta 90 zenbakietan. Etxebizitzak 56,46 eta 84,65 metro koadro artekoak dira, eta sukaldeak etxeko tresna guztiez hornituta daude. Horretaz gain, igogailuaren bitartez lotutako garajea eta ganbera dute. Bestalde, mugikortasun gutxitua duten pertsonentzat hiru etxebizitza gorde dira, horretarako bereziki prestatutakoak. Argazkian, Arruebarrena eta Madrazo giltzak banatzen.Udal leioaztarreko iturriek aipatu dutenez, promozio berria eraikuntza jasangarriaren aldekoa da. Horregatik, energia ustiatzeko elementuekin osatuta dago: ura berotzeko eguzki-panelak edota etxe bakoitzeko tenperatura kontrolatzeko termostatoz erregulatutako galdara, besteak beste. Bizilagun bakoitzak ordaindu beharreko errenta bere diru sarreren eta etxebizitzaren azaleraren araberakoa izango da, gaineratu dutenez. Dena dela, hileroko batez besteko errenta 186 eurokoa da. Hau honela, promozio honetan egindako inbertsioa 6 milioi euro ingurukoa izan da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun