Zubilletako auzokideei etxebizitza berria eman beharko lieketela uste du Getxoko Ezker Batuak

Udal agintariak ez ezik, Iñaki Urkiza Getxoko Ezker Batuko bozeramailea ere hurbildu da Algortako Zubilleta auzoko bizilagunengana, goizez. Uriolen gehien kaltetzen duten aldea "beti" Zubilleta izaten dela aipatzearekin batera, "benetako errua" bertan etxebizitzak eraikitzeko baimena eman zutenena dela adierazi du alderdi federalistako zinegotziak. Urkizaren hitzetan, "ezin da auzokideak horrela eduki. Guztiz larrituta bizi dira. Bizilagunak beste leku batean bizitzera eramatea izango litzateke konponbiderik onena, eta ingurua ibaiari bueltatu". Hala ere, auzokide guztiak horrekin ados ez daudela dio Urkizak. Besteak beste, Salsiduko zubi azpia hustu eta, horrela, zuloa 5-6 metro zabalago egitea aurreikusten du URA agentziaren plangintzak. Argazkian, Iñaki Urkiza Getxoko EBren bozeramailea prentsaurreko batean.