Espainaiko Gobernuaren dirua nagusien etxea egiteko erabiliko dute Barrikan
2009ko urt. 27a, 22:37
Espainiako Gobernuak onartutako tokiko erakundeei laguntzeko funtsetik egokitutako 248.669 euroko diru laguntza nagusien etxea egiteko erabiliko du Barrikako Udalak. Erabakia aho batez hartu zen joan zen asteazkenean, urtarrilaren 21ean, ez ohiko osoko bilkuran. Egitasmoaren arabera, egoitza eta terraza eraiki eta lorategiko esparrua eratuko dira, Elejalden. Gainera, egoitzaren kudeaketa auzotarren esku egongo da. Horrenbestez, Barrikan enplegua sustatuko duen proiektua izango da, tokiko arduradunen arabera. Juan Jose Ezpeleta alkateak egitasmoaren garrantzia azpimarratu du: “Lokalen beharra dugu. Bereziki, biztanleriaren sektore horrek ez du biltzeko tokirik. Horrela, udalak dituen beharrei erantzun bat gehiago emateko ahalegina da”, esan duenez. Argazkian, Barrikako Elejalde auzoa.Nagusien etxea Elejalden egongo da, mediku kontsultaren ondoan. “Gune hori etorkizunean indartu egingo da, bertatik bertara dugun udal ordenamenduarekin”, gaineratu du Ezpeletak. Hasiera batean, Larretxe auzoan egin nahi zuten proiektua, alondegi zaharrean. Baina eraikinak zaharberritze lanak behar ditu. “Epez kanpo gelditzeko arriskuan geunden. Alondegiko eraikina erabilera desberdinetarako egokitua geldituko da etorkizunean”, zehatu du alkateak. Nagusien etxeak 190 metro koadroko azalera beteko du, 30 eta 40 metro koadro bitarteko terraza barne. Ondoan izango dituen lorategien esparrua gehituta 300 metro koadroko azalera izango du. Eraikinak solairu bakarra izango du ondokoekin: jolas-gela, egongela, kafetegia (sukalde, biltegi, atondo eta komunekin), bulegoa, erabilera askotarako gela eta egokitutako komunak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun