Zerrendakideei dagokienez, eskualdeko hainbat politikari ezagun topa daitezke. Besteak beste, Legebiltzarrerako bidean Marisa Arrue ohiko Getxorako alkategaia jarri du PPk, seigarren postuan. Zerrendan bidelagun, Iñaki Gamero eta Raquel Gonzalez zinegotzi getxoztarrak, Xabier Olabarrieta Leioako bozeramailea eta Areetan bizi den Carlos Iturgaiz europarlamentarioa izango ditu Arruek. PSE-EEk Patxi Lopez aurkeztuko du lehendakarigai eta berarekin Isabel Celaa Leioa eta Erandioko campuseko liburutegi nagusiko arduraduna eta Idoia Mendia Barrikako zinegotzia eramango ditu, beren legebiltzarkide jesarlekuak berresteko. Zerrenda horretan, Pilar Perez-Fuentes EHUko irakaslea eta Jose Alfonso Lopez Arevalillo Leioako zinegotzia ere ageri dira.
Landa lehendakari?
EAJn, berriz, Imanol Landa Getxoko alkatea aurkeztuko dute 14. zenbakian, Izaskun Bilbao Legebiltzarreko presidentea eta Andoni Ortuzar Bizkai Buru Batzarreko arduraduna zerrendaburuak izango direla. EAk, PPk eta ezker abertzaleak zabaldutako tesiaren arabera, Ibarretxe ez litzateke izango balizko EAJ eta PSE-EEren Gobernuaren lehendakaria. Eta lehendakaria izateko aurretik legebiltzarkidea izan behar denez, hipotesi horretan Landa ez litzateke txarto kokatuta. Baina, zerrendan Jose Luis Bilbao diputatu nagusia ere badela ez da ahaztu behar.
Era berean, UPDko zerrendan Fernando Maura aspaldiko Getxoko PPren kidea joango da, azken postuetan. Bitxia da zerrendako hirugarrena, berriz, Ezker Batuko kide ohi bat izatea: Kati Gutierrez. Aldiz, Ezker Batuak Isabel Dolores Garcia Leioako zinegotzia sartu du Javier madrazok irekitzen duen zerrendan. Bertan, Omer Oke Inmigrazio zuzendaria izandakoa ere ageri da. EAri dagokionez, Leire Pinedo zinegotzi sopeloztarra ageri da Unai Ziarreta babestuko duten Joseba Azkarraga, Tontxu Campos, Begoña Errazti eta bestelako hautagaien artean. Aralarrek Nahikari Ayo itzubaltzetarra aurkeztuko du, Dani Maeztu Durangoko zinegotzia zerrendaburua izango dela.
Azkenik, Algortan bizi den Gabi Basañez sopeloztarra eta Erika Bilbao erandioztarra ageri dira, D3Mko zerrendan, hainbat izen ezagunen artean. Besteak beste, Itziar Lopategi LABeko kidea, Julen Aginako ezker abertzaleko militante historikoa, Aitor Sarrionandia hautetsi independentista deustuarrra, Oiakue Azpiri 18/98 auzian absolbitua edo Onintza Enbeita bertsolaria topatu daitezke bertan.
Zerrenda guztiak
Arabako zerrendak (pdf)
Bizkaiko zerrendak (pdf)
Bizkaiko zerrendak (pdf)
Hamasei alderdi eta hautesleen elkarte aurkeztu dira Bizkaian datorren martxoaren 1ean egingo diren Eusko Legebiltzarrerako hauteskundeetarako. Araban eta Gipuzkoan, berriz, gutxiago izan dira uribekostar, erandioztar eta beste bizkaitarren botoak lortuko dituztelakoan izena eman dutenak, 12 eta 11, hurrenez hurren. Partido Familia y Vida Bizkaitik aurkeztuko den Espainiako muturreko eskumako alderdi bakarra izango da. Alderdi Espainiarzaleak hiru izango dira (PSE-EE, PP eta UPyD), Estatu espainol federalista proposatzen dutenek beste (Ezker Batua, POSI eta Euskal Herriko karlisten Alderdia). Abertzaleak gehiago izango dira (EAJ, EA, Aralar eta ilegalizatuak izatearen mehatxupean dauden D3M eta Askatasuna). Azkenik, arazo sektorialei erantzuna eman nahi dieten alderdiak (Berdeak, PACMA, eta PUM+J) eta sailkaezinak (Alderdi Humanista) daude. Bizkaiko zerrendak hemendik jaitsi daitezke (pdf). Uribe Kostako politikari asko agertzen da bertan. Bestalde, EAJk bihar goizean hauteskunde kanpainaren aurkezpena egingo du Sabin Etxean eta etzi, larunbata, D3Mk nazio ekitaldia egingo du Donostiako Kursaalean. Algortatik autobusa jarriko dute, 15:00etan Kirikiñon. Izen ematea Amnistia tabernan egin daiteke. Argazkian, Gabi Basañez D3Mko kidea Israelen aurkako ekimen batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun