Urrian hasi zen taldean Algortako 15 lagunek parte hartu dute Dendaketan ikastaroan, udal iturriek adierazi dutenez. Orain, nahi izatekotan, jarraitzeko aukera edukiko dute horiek. Bestalde, orduan bere nahia agertu zuten, baina kopuru nahikorik ez izateagatik, taldea osatu ezin zuten Itzubaltzeta / Romo eta Areetako merkatarirekin, ikastaroa martxan jartzen saiatuko dira; baita Algortan beste berri bat ere. Ikastaroa astean bi egunez egingo dute, bakoitzeko hiru eskola ordu emanez. Prezioa 50 eurokoa da eta, ikastaroa amaitzen dutenei, 25 euro bueltatuko dizkiete, baita diploma eta materiala opatu ere.
Etorkinentzako Aisa ikastaroak
Bestalde, etorkinek hemengo ohiturak eta euskara ikasten lehenengo pausuak emateko, urrian martxan jarritako Aisa ikastaroak eduki duen harrera ona ikusita, matrikula egiteko epea zabaldu dute. Alde batetik, orduan tokirik gabe geratu ziren 22 laguni aukera emango zaie euskara ikasten hasteko; eta bestetik, orain interesa dutenek ere izena eman ahal izango dute. Urrian hiru talde, 46 bat ikaslerekin, jarri ziren martxan eta horietatik gutxienez batek segitu egingo du, beste 60 eskola-ordu egiteko.
Aisa egitasmoaren balantzea "oso positibotzat" jo dute udal arduradunek, "Getxo baita EAEn talde eta ikasle gehien dituen udalerria". 2005ean jarri zen martxan egitasmoa udalerrian eta, ordutik hona, 19 ikas-talde izan dira. Horietan 271 etorkin aritu dira euskarara hurbiltzeko klaseak jasotzen eta gainera 3 taldek jarraitzea eskatu dute. Getxoko Aisa taldeetan parte hartzen duten lagun gehienak gazteak dira, %65a emakumeak eta Bolibiakoak eta Kolonbiakoak nagusiki. Guztira 33 jatorri desberdinetakoak dira, tartean, Errumaniakoak, Suediakoak, Greziakoak, Amerikako Estatu Batuetakoak, Alemaniakoak edo Marokkokoak. Aisa ikastaroa astean bi egunetan izaten da, lau eskola-ordurekin, guztira 60 ordu. Prezioa 10 eurokoa da. Gainditzen dutenei dirua itzultzen zaie eta diploma eta hiztegi bat eman ere.
Getxoko Udaleko Euskara Zerbitzuak bultzatutako Dendaketan eta Aisa euskara ikastaro berrietarako izenemateak otsailaren 16ra arte egongo dira zabalik. Bezeroei euskaraz kasu egiten jakiteko ikastaro laburra da Dendaketan izenekoa, Getxoko dendetan eta ostalaritzan lan egiten ari direnentzat; baita lan egin nahi izango luketenentzat ere. Bestalde, etorkinek hemengo ohiturak eta euskara ikasten lehenengo pausuak ematea du helburu Aisak. Batean zein bestean, martxoaren 2an hasiko dira eskolak. Izenematea egiteko eta informazio gehiago eskatzeko, udal euskaltegira (944 646 299), Lauaxeta AEKra (944 304 734) eta Jose Antonio Agirre euskaltegira (944 606 671) jo dezakete interesdunek. Argazkian, abenduan, okindegietan euskararen erabilera sustatzeko egitasmoa aurkeztu zuen Koldo Iturbe Euskara zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun