Eli Zubiaga Kordobako espetxera eraman dute

Dagoeneko sakabanatzen hasi dira urtarrilaren 23an Espainiako Poliziak atxilotutako zortzi lagunak, "Gara" egunkariak zabaldu duenez. Horien artean, Eli Zubiaga algortarra eta Iker Rodrigo lutxanarra atzeman zituzten, Baltasar Garzon epailearen aginduz; baita Arantza Urkaregi EHUko irakaslea ere. Guztiei, Batasuneko zuzendaritza berria osatzen jardutea leporatzen diete, D3M plataforma eta Askatasuna alderdia martxan jartzearekin batera. Horretan oinarrituta, "erakunde terroristako kidetzat" jotzen dituzte. Soto del Realgo (Madril, Espainia) espetxera bisitan joan direnean jakinarazi diete etxekoei euren familiarrak bertan ez zeuzkatela. Gararen arabera, antza, lau gizonak kartzelaz aldatu dituzte jada; horietako bat Valdemoron (Madril, Espainia) legoke. Bitartean, emakumeetako bi ostiralean aldatu ei zituzten. Uribe Kostako Amnistiaren Aldeko Mugimenduak jakinarazi duenez, Eli Zubiaga gaur goizean atera dute Soto del Realdik, Kordobako espetxera eramateko. Azken hori Getxotik 818 kilometrotara dago. Bitartean, ostiral honetarako, otsailak 6, "salbuespen egoeraren kontrako" ekitaldi politikoa eta manifestazioa deitu ditu Algortan ezker abertzaleak; eskualde mailakoa berau. Arratsaldeko 8etan jarri dute hitzordua, Telletxe plazan. Argazkian, Eli Zubiaga, Iker Rodrigo eta gainontzeko sei lagunen askatasuna aldarrikatzeko manifestazioa Algortan.