Leioa, Itzubaltzeta eta Algortako BBKren haur eskoletan izena eman daiteke jada
Otsailaren 27ra arte egongo da zabalik BBKren Haur Eskoletan 2009-2010 ikasturterako izena emateko epea. Guztira 887 plaza eskainiko dituzte 0 eta 2 urte arteko neska-mutilentzat, erakundeak prentsa ohar bidez gaur jakinarazi duenez. BBKren Haur Eskola sarea erakundearen 15 ikastetxek osatzen dute. Horietatik hiru Uribe Kosta eskualdean daude: Algortako Olarretxe kaleko 33. zenbakian, Itzubaltzeta / Romoko Ezekiel Agirre kaleko 21. atarian eta Leioako Ikea kaleko 13.ean, hurrenez hurren. BBK-ko Haur Eskolen arduradunen arabera, hezitzaileak "ardura osoz" aritzen dira ongi prestatutako geletan, "garapenerako giro bikaina sortuz". Euren seme alabak bertara eraman nahi dituzten sendiek BBKren web-orrian (www.bbk.es) eskuragarri dagoen eskaria bete eta eskoletara eramatea besterik ez dute. Argazkian, hainbat ume haur-eskolan.
BBKren Haur Eskolen sareak 0 eta 2 urte arteko haurren artean egiten duen hezkuntza lanak "beharra eta familia bateragarri egiteko aukera dakarkie gurasoei", arduradunen arabera. Halaber, "haurrei, beren garapen intelektuala eta fisikoa aurrera eraman ahal izateko pizgarriak eskaintzen dizkie sareak, gizarte harremanen lehen ikasgaiak ematearekin batera", gaineratu dutenez. Esan bezala, guztira 887 plaza eskainiko dira 2009-2010 ikasturtean. BBKren Haur Eskolak 7:30etik 18:00ak arte egoten dira zabalik, eta gehienetan hezkuntza elebiduna eskaintzen dute. Guztira 140 hezitzaile aritzen dira lanean, eta azpiegiturak ere egokiak dira: txikienak, 0 eta 1 urte artekoak, "sehaska" izeneko geletan egoten dira; eta "lau hankako" geletan 1 eta 2 urte artekoak. Musikarekin gozatu eta ikasteko aukera ere eskaintzen dute BBKren Haur Eskolek, eta hitzezko, plastikazko edo begizko lengoaiak lantzen dituzte. Jolasek psikomotrizitatea hobetzeko aukera ematen dute, eta haurren arteko harremanak elkarbizitzaren eta begirunearen lehen ikasgaia izaten dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun