Indarkeria dela eta, Guatemalako emakumeek bizi duten egoerari buruzko hitzaldia antolatu du ostegun honetarako, otsailak 5, Lagun Artean elkarteak. Getxoko Udalaren Berdintasun eta Garapenerako Lankidetza sailekin elkarlanean, Lilian Wug Nuevos Horizontes (ANH) izeneko elkartearen zuzendariak eskainiko du mintzaldia. Ekimenaren helburua, emakumeek bizi duten indarkeria mota desberdin batzuei aurre egiteko proposamenak elkartrukatzea izango da, udal iturriek aipatu dutenez. Etziko saioa 19:30ean izango da, Algortako Villamonte kaleko kultur aretoan. Hitzaldian Guatemalan dagoen genero indarkeria aztertuko dute; baita indarkeriari aurre egin eta berau prebenitzeko ANH egiten ari den lana ere, indarkeri mota guztiak zehaztuz. Amaieran galderak egiteko txanda izango da. Argazkian, hainbat emakume Guatemalan / El Brujo-antes eapoemex.
Nuevos Horizontes elkarteak "jendarte zuzenagoa" sortzen laguntzen du; hau da, "sustapen integraleko espazioen bidez eta giza eskubideak errespetatuz, genero berdintasuna lortuko duen jendartearen alde egiten du", Getxoko Udaletik aipatu dutenez. 1989az gero dabil elkartea arlo horretan lanean, batez ere Quetzaltenango (Guatemala) departamenduan. Gaur egun, genero indarkeriari arreta ematea eta prebenitzea du jarduera nagusia, emakumeek bizi duten egoeraren jarraipena gertutik eginez. Horretarako, programa ezberdinak garatzen dituzte, hala nola: indarkeriaren biktima diren umeentzako aterpetxea mantentzea; mediku arreta eta laguntza psikologikoa, soziala eta juridikoa ematea; emakumeak lan esparruan treba daitezen bultzatzea; sexuari eta ugalketari lotutako osasuna sustatzea; emakumeen antolaketa bultzatzea, batez ere nakoitzak norberari laguntzarako espazioen eta nork bere burua zaintzeko taldeen bitartez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun