Joan den asteko uriolek Gobelan utzitako hondakinak kentzen ibili da Getxoko Udala
Urtarrilaren 27tik otsailaren 2ra bitartean, plastikoak, arbola adar txikiak, bidoiak, tutu zatiak eta bestelako hondakinak kentzen ibili dira, Gobela errekan, Getxoko udal langileak. Tokiko arduradunek zehaztu dutenez, guztira 720 kilo tamaina eta pisu txikiko hondar atera dute. "Kopuru horri atzo eta gaur batutako kiloak gehitu behar zaizkie, zenbatekoa oraindik zehaztu ez bada ere", gaineratu dutenez. Udal iturrien arabera, urtarrilaren 27ko errekaren goraldiaren ondotik, Gobela, Kandelu eta Bolue ibaiak begiztatu zituzten presagainak sortarazi zitzaketen hondakinen bila. Miaketaren ondorioz, uriolen hurrengo bi egunetan, hilaren 28an eta 29an, 3 urtegi desegin zituzten Salsidu, Kandelu eta Zubileta aldeetan. Urtarrilaren 30ean eta otsailaren 2an, berriz, Kandeluko ahotik Gobelarako ezpondetan ur goraldiak utzi zituen hondakin txikiak batzeko lanak hasi zituzten. Azkenik, atzo eta gaur, Etxezuritik Fadura arteko tartean eta Zubiletan egin dute lan, bi langile gehiagoren laguntzaz. Argazkian, auzokide bat ibaiari adi urtarrilaren 27an.
Errekaren goraldiak utzitako sastarrak batzeko lanak asteon amaituko dituzte eta datorren astelehenetik, hilak 9, aurrera urtero sastraka kentzeko Gobela errekan egiten diren ohiko lanekin jarraituko dute. “Garbiketa osoa hasi dugu egunotan errekan pilatutako hondakin guztiak kentzeko; halere, oraindik egiteke dagoen lanarekin arduratuta gaude eta garbitze lanekin segituko dugu uberka ahalik eta baldintza hoberenetan uzteko”, adierazi du Imanol Landa alkateak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun