Helburu horiek guztiak zabalduta dagoen "krisialdiak baldintzatuta" daude, udal agintariaren hitzetan. Horrek suposatuko du, besteak beste, “Udalkutxatik, hau da, Bizkaiko Foru Aldundiaren diru-sarreren soberakinetik sartzen den diru kopuruaren murrizketa; baita Udalak herritarrengan eta enpresengan dagoen presio fiskala moteltzea ere”, Landak aurreratu duenez. Ildo horretan, atzo Luis Almansa Getxoko PSE-EEren bozeramaileak aurreratu bezala, Udalak tasak jaitsiko ditu: besteak beste, zarama bilketagatik %30 gutxiago ordainduko dute herritarrek eta %35 gutxiago dendek eta enpresek. “Jaitsiera hau arrazoituta dago”, esan du alkate getxoztarrak, “unean bizi dugun ezohiko krisialdian eta herritarrei Getxon ezinbestekoa den merkataritza sektoreari lagundu nahi diogula, mezu hori helarazteko”. Hala ere, jaitsiera hori ez da inondik inora heltzen, sinaduren bitartez ehunaka herritarrek eskatutako %86ra; Iñaki Zarraoa alkate zela zarama tasa igotzea erabaki zuten beste horrenbestera, alegia. Ezarritako helburuak lortu ahal izateko Getxoko Udalak “arrazoizko” zorpetzeari ere ekingo dio, "legeak ezartzen duena baino maila askoz txikiagoan", eta hori, “Udalak azken urte hauetan egin duen kudeaketa bikainari esker, oso egoera ekonomiko onean dagoelako”, Landak dioenez.
Zorpetzea
Aurtengo udal aurrekontua 100.670.018 eurokoa da (iaz baino %3,66 gehiago). Diru sarreren murrizketari eta zerbitzuen mantenuari aurre egiteko, udalerriaren garapenerako beharrezkoak diren inbertsioak egiten jarraitzeko, eta sustapen ekonomikorako aurreikusitako ezohiko plan bat aurrera eramateko, 6,3 milioi euroko zorpetzeari ekingo dio (aurrekontuaren %6,26) Getxoko Udalak. Zorpetze hori hurrengo urteetan mantenduko da, nahiz eta txikiagoa izan, udalerrian "estrategikoak" diren bi proiektu handi aurrera eramateko: Algortan Getxo Antzokia eraikitzeko eta Itzubaltzeta / Romoko Santa Eugenia plazan kultur etxea egiteko. "Horrela, bi egitasmo horiek euren bideragarritasun ekonomikoa ziurtatuta izango dute", Landak aipatu duenez.
Giza politikak garatzeko 18.488.858 euro erabiliko ditu (aurrekontuaren %18,4%) tokiko erakundeak. Udalerriko sustapen ekonomikorako, berriz, 6.420.218 euro. Arlo horretan azpimarratzekoa da Getxoko ekonomia sustatzeko egingo den ezohiko programa batean erabiliko diren 3.250.000 euroak. Azkenik, eta udalerri osoa hobetzeko, 15 milioi euro erabiliko dira –bertan ez dira proiektu estrategikoak sartzen, urte anitzetan finantzatuko direnak–. Horri guztiari gehitu behar zaio hain zabala den eskaintza kulturala eta kirol arloan mantenua, arlo ezberdinetan lan egiten duten elkarteentzako laguntzak, eta euskal kulturaren aldeko, eta euskararen normalizaziorako eta sustapenerako "apustu garbia".
Hauteskundeen ostean "akordioaren bidean jarraitzera" animatu du PSE-EE Landa alkateak
Getxoko EAJk eta PSE-EEk 2009ko aurrekontuen gainean lortutako hitzarmena "oso positibotzat" jo du, gaur goizeko prentsaurrekoan, Imanol Landa alkateak. Legealdia hasi zenetik "lehenengo akordio garrantzitsua da hau”, udal agintariak berak aitortu duenez. “Orain arte legealdiaren ezaugarri nagusiena izan da PP eta PSE-EEren artean zeukaten udal gobernuaren kontrako frontea. Akordio honek argi adierazten du arlo honetan, udal garapenerako beste arlo batzuetan bezala, udal gobernu taldeak duen borondatea solaskide egokia aurkitzen duenean akordioa sortzen baita beti”, gaineratu du Landak. Alkate getxoztarrak ongi etorria eman dio talde sozialistari “eraikitze-elkarrizketaren, negoziazioaren eta akordioaren bidera”. Are gehiago, martxoaren 1eko Eusko Legebiltzarreko hauteskundeak baino haratago, "jarrera horrekin jarraitzeko" animatu du PSE-EE Landak. Udal Gobernuak eta tokiko sozialistek asteartean, otsailak 3, sinatu zuten 2009ko aurrekontuen gaineko hitzarmena. Horrela, Getxoko Udalak ehun milioi euro baino gehiago izango du aurten, “bertoko jarduera ekonomikoa suspertzeko, egoera latzean daudenei laguntzeko eta udalerrirako estrategikoak diren ekimenak ziurtatzeko", Landak adierazi duenez. Argazkian, Imanol Landa alkatea eta Aitor Soloeta Ogasun zinegotzia aurreko prentsaurreko batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun