Gomendioak:
- Itsasoan eta mendian arrisku jarduerarik edota irteerarik ez egitea.
- Ate-leihoak ixtea eta haizeak eroan eta istripuak eragin ditzaketen tresnak kentzea kanpoaldetik (lorontziak, arropak esekitokietatik eta abar).
- Kontu handia jartzea kalean jarritako behin-behineko aldamioen azpitik ibiltzean.
- Merkataritzako lokalek kalean ondo tinkatu barik dituzten olanak, mahaitxoak eta antzekoak kentzea.
- Aldamio, obretako hesi eta behin-behineko instalazioen arduradunek behar diren segurtasun-neurriak hartuko dituzte instalazio horietan.
- Errepidetik autoz joatea ekiditen saiatu behar da. Autoa erabili behar izanez gero, kontu handia eduki leku zabaletatik eta zubietatik igarotzean. Trafikoa Kudeatzeko Zentroaren informazio telefonoa honakoa da: 902 112 088.
- Zuhaitzetatik, hormatatik edo teilatuetako erlaitzetatik urrun ibiltzen saiatzea eta lanetan dauden edo egoera txarrean dauden eraikuntzetatik urrun ibiltzea.
- Era berean, eta haize-bolada indartsuen ondorioz, zarama Bilketarako Udal Zerbitzuak gauean ez du zarama edukiontzietatik kenduko, horiek mugi ez daitezen. Beraz, herritarrei eskatzen zaie beren sastarrak bihar arte kalera ez jaisteko.
- Oro har, norabait joatekotan, eguraldiaren iragarpen hau aintzat hartzeko eskatzen dizuegu, haize-bolada indartsu horiek eragin dezakeen arriskutik babesteko (zuhaitzak jaustea, haizeak eroandako tresnak), eta arreta berezia jartzeko autoa hartu behar izanez gero.
- Larrialdiren bat izatekotan honako telefono zenbaki hauetara deitu behar da: 944 660 202 (Getxoko Udaltzaingoa) eta 112 (SOS DEIAK).
Euskalmet agentziak egindako iragarpenaren arabera, hego-mendebaldeko haize-bolada indartsuak izango dira eskualdean gaur hasi eta bihar eguerdiraino. Zenbait lekutan, haizeak 80 kilometro orduko abiadura gaindituko dute, eta leku irekietan, abiadura 120 kilometro ordutik gorakoa izan daitekeela-eta ezarritako alerta egoerari eutsi dio Herrizaingo Sailak. Getxoko Udala, berriz, alerta laranjan dago eta gaur arratsaldean eta gauean bertan behera utzi ditu Getxo Kirolak erakundeko eta udalerriko herri ikastetxeetako, pribatuetako eta kontzertatuetako kanpoko jarduerak. Era berean, Fadurado estalpeko tenis pistak ere itxi ditu "zuhur jokatuz". Gainera, datozen orduotan, marea biziekin batera, 5 metroko olatuak izatea iragarri dute; hortaz, "kostaldean edota itsasoan jardutea oso arriskutsua bihurtuko da", Herrizaingo Sailak adierazitakoaren arabera. Bihar, asteartean, haizea aldatuz joango da, eta mendebalde-iparmendebaldekoa izango da. Bitartean, herritarrei hainbat gomendio jarraitzea eskatu diete erakundeek. Argazkian, aurreko zikloiak Areetan suntsitutako Sapaburu belaontzia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun