Palestina izango dute hizpide aste honetan Itzubaltzetan, Algortan eta Plentzian

Pasa den otsailaren 1ean Erandion gertatu bezala, Palestina izango dute gai nagusitzat Uribe Kostan aste honetan egingo diren hainbat hitzalditan. Etzi, asteazkena, hilak 11, "Palestina Gazako sarraskiaren ondoren" hitzaldia eskainiko du Askapena erakunde internazionalistako kide batek Itzubaltzeta / Romoko Itzubaltzeta gaztetxean. Hitzordua 19:30ean izango da. Hurrengo egunean, ostegunean, 20:00etan, Algortako Villamonte kaleko kultur etxean mintzatuko dira Jon Etxebarria eta Imad Alsoos. Lehenengoa Askapeneko kidea da eta Israeli boikot kanpainaz arituko da. Alsoos Gazako palestinarrak, ordea, eraso sionista, erresistentzia eta Gazako eguneroko bizitza izango ditu hizpide Gorrondatxe kultur elkarteak antolatutako ekimenean. Azkenik, ostiralean, hilak 13, gai bera izango dute mintzagai igandera arte Palestinari buruzko argazkiak erakusgai dituen Plentziako Izarraitz tabernan. Kasu horretan, Komite Internazionalistako kide bat arituko da solasaldian, arratsaldeko 6etatik aurrera. Bi ekitaldiok Plentziako Gazte Asanbladak antolatu ditu.