2008ko maiatzaren 15etik azaroaren 14ra bitartean, 11.531 lagunek erabili zuten Getxoko Udalak bizikletak maileguan uzteko doako zerbitzua; horiek 31.429 aldiz erabiliz. Keltse Eiguren Ingurumen zinegotziak “oso positibotzat" jo ditu emaitza horiek. 2007an, denbora tarte berean, 2.429 lagunek erabili zuten zerbitzua, bizikleta 5.017 aldiz mailegatuz, tokiko iturrien arabera. Hainbeste jende hurbildu denez, etorkizunean hainbat hobekuntza egitea aurreikusten dute: zerbitzuguneak urte osoan zehar zabaltzea, egunean ordu gehiagotan; bizikleta kopurua handitzea; eta bizikletak hartzeko gune gehiago jartzea, besteak beste. Eigurenek adierazi duenez, "ekimenak duen helburu hirukoitza lortu dugu: enpleguaren sustapena, turismoaren promozioa eta herritarrak mugikortasun iraunkorraz arduratzea”. Argazkian, Landa alkatea eta Eiguren bizikleta gainean.
Zerbitzuak dituen helburuen artean lan egiteko arazoak dituzten pertsonei laguntza ematea dago, horien laneratzea errazteko. Eskaera egin zuten 100 lagunetatik 17 kontratatu zituzten, haietariko 11 emakumeak, zerbitzua martxan egon zen sei hilabetetan lan egiteko. Horietatik guztiak 40 urtetik gorakoak dira eta, zehazki, hiru 50 urtetik gorakoak. Ingurumenari dagokionez, Kiotoko Protokoloak ezarritako parametroei jarraituz ebaluatutako datuek zera eman dute aditzera udal arduradunek: egin diren 31.429 maileguei esker, 35.375 kilogramo Co2 ez emititzea lortu zela. Gainera, kutsadura akustikoa nabarmenki txikitu zen. Izan ere, bizikletek, motorra duten ibilgailuek baino askoz zarata txikiagoa egiten dute (hala ere, eragin honen traba zera da: oso zaila dela neurtzea).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun