"Bakoitzak berea, denok batera!” lelopean, kanpaina berria jarri du martxan Getxoko Udalaren Berdintasuneko Zerbitzuak. “Kanpainaren helburua emakume eta gizonen arteko harremanen eredu berria lortzearen alde lan egitea da, etxeko lanak eta zaintza lanak benetan bana daitezen; eta horrela pertsona guztiok asmo pertsonal eta profesionalak asetzeko moduan egoteko, emakume zein gizon izan”, Keltse Eiguren Berdintasun zinegotziak gaur azaldu duenez. Ildo horretan, etxeko lan eta zaintzaren arduradun nagusiak izateak lan arloan emakumezkoei dakarzkien desabantaila eta diskriminazioak ere agerian utzi nahi ditu. Kanpainaren euskarria Udalak kaleratutako foiletoa da eta horren 4.000 ale banatuko ditu ohiko lekuetan. Horretaz gain, Udalak Algortako kultur etxeko gizonentzako komunean haurrei pixoihalak aldatzeko gunea egokitu du eta bestetik, oinezkoen gunetan hainbat trafiko seinale aldatu ditu. Horietan, lehen, emakumezko bat umearen kotxearekin agertzen zen eta orain figura neutroa ikus daiteke. Argazkian, Keltse Eiguren Berdintasun zinegotzia, prentsaurreko batean.
Liburuxkak agerian uzten du etxe batean bizi diren pertsona guztien artean lana banatzearen beharra. “Lehen atalak azken urteotan eman diren aldaketak eragin duten pertzepzioa eta zenbait datuk erakusten duten errealitatea batera jartzen ditu. Horrekin batera, egoera eraldatzeko eta partekatuagoa lortzeko eman beharreko hainbat urrats ere jasotzen ditu”, adierazi du Eigurenek. Foiletoaren arabera, Euskal Autonomi Erkidegoko emakumeek etxeko lanen %70 baino gehiago egiten dute. Gizonek egunean, bataz beste, 1,5 ordu eskaintzen diete etxeko lanei eta emakumezkoek, berriz, 4,3 ordu. Bestalde, mendekotasun egoeran dauden pertsonen zaintzaileen %84 emakumezkoak dira. Bizkaian aiten %2,9ak soilik eskatu zuten aitatasun baimena 2007.urtean. Erkidegoan emakumeen %25ak lanaldi partzialean dihardute eta gizonen %3a bakarrik ari da lanaldi partzialean. Egoera hori eraldatzeko, kanpainak aldaketa batzuk proposatzen ditu, besteak beste, “jendarte osoan denbora berrantolatzea; zaintzarako komunitateko zerbitzu gehiago egotea; “zaintzaren etikari” garrantzi handiagoa ematea; familia mota ezberdinak daudela onartzea, etxeko pertsona guztien artean bizikidetza arau batzuk adostuz”, zehaztu du Berdintasuneko zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun