Imanol Landa alkateak eskerrak eman die gaur Villamonteko bizilagunei, proiektua aurrera eraman ahal izatea posible egiteagatik. Prentsaurrekoan adierazi duenez, "proiektu garrantzitsua da, Algortako erdigunera iristeko dauden bi mailak gainditzea ahalbidetuko duelako, batez ere mugitzeko zailtasunak dituzten pertsonei mesede eginez". “Proiektua ez litzake posible izango auzotarrekin akordioa lortu izan ez bagenu, eta horrek argi eta garbi erakusten du auzotarrek, jabeen erkidegoaren ikuspuntua baztertu eta horren gainetik, udalerriaren interes orokorraren alde, adostasuna eta oreka lortzeko ahalegina egin dutela”, nabarmendu du Landak. Alkatearen berbak berretsiz, lortutako akordioaren garrantzia azpimarratu du Marivi Argaluzak, Villamonteko Jabeen Elkargoaren izenean, “herritar guztien onerako dela" aipatuz.
FEKOOR Minusbaliotasun Fisikoa duten Pertsonen Bizkaiko Koordinadorak ere lagundu du akordioa lortzen, aztertu dituzten balizko zortzi aukeren artean adostutako irtenbidearen aldeko iritzia baitu. Proiektuaren inguruko datu teknikoei dagokienez, Hirigintza arloko zinegotzi Joseba Arregik azaldu du, bi igogailuek 10 metro inguruko aldea gaindituko dutela, maila bakoitza burdinazko pasabide batekin lotuko dutela. Igogailuetan 13 lagun sartu ahal izango dira. “Kamera bidezko etengabeko zaintzapean egongo dira, baina, jakina, ez dute inguruko auzotarren intimitatea aztoratuko”, zehaztu du Arregik.
Villamonten igogailuak jartzeko hitzarmena adostu dute auzotarrek eta Getxoko Udalak
Getxoko Udal Gobernu taldea eta Algortako Villamonte inguruko etxeetako Jabeen Elkargoa akordio batera iritsi dira, azken horrek igogailu publikoak ipintzeko beharrezkoak diren lurrak Udalari dohainik emateko. Gobernu Batzordeak, aste honetan bertan onartu du Villamontetik Telletxe plazara eta metrora errazago iristeko bi igogailu publikoak jartzeko lanen proiektua eta horiek kontratatzeko espedientea hastea. Aipatu guneak gaur egun bi eskailera-atalek lotzen dituzte. Lanen aurrekontua 715.000 eurokoa da. Udaberrian hastea aurreikusi dute eta urtearen amaieran bukatu. Akordioaren arabera, jabeen erkidegoak behekaldeko igogailua ipintzeko lurrak debalde emango ditu. Udalak, bere aldetik, lur horietan berehala igogailuak egin eta kokatzeko hitza eman du. Argazkian, udal agintariak eta jabeen elkargoaren kideak, Vilamonteko eskailerak igotzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun