Getxo eta Algortako hainbat kale eraberrituko dituzte Espainiako Gobernuaren diruaz
Udalak 730.000 eurotik gora inbertituko du Getxoko Unbe, Urduña eta Iturribide, eta Algortako San Martin eta Jaime Morera kaleak hobetu eta osorik eraberritzeko. Aipatu lehen bi kaleen artean dagoen parkea ere konponduko dute. Imanol Landa alkateak gaur zehaztu duenez, Espainiako Gobernuak onartutako tokiko erakundeei laguntzeko funtsaren dirua erabiliko dute horretarako. Obrak maiatza aldera has litezke, tokiko iturrien arabera, eta hauek amaitzeko sei hilabeteko epea egongo da. Lanotan 28 beharginek jardungo dute. Proiektuaren helburua da aipatu kale horietan “oinezkoak erabiltzeko diren guneak era nabarmenean hobetzeko lanak egitea, espaloiak gaur egun oso estuak baitira eta zoladura hondatuta baitago”, Landak esan duenez. Argazkian, Joseba Arregi Hirigintza zinegotzia argibideak ematen, gaurko prentsaurrekoan.
Hartara, espaloiak zabaldu eta zolatuko dituzte eta oinezkoentzako zebrabideak berriztatuko dira espaloiak luzatuz, Getxoko Unbe, Urduña eta Iturribiden –Sarrikobaso eta Urduña kaleen arteko tartean–, eta Algortako San Martin –non arbola batzuk ere landatuko dituzten– eta Jaime Morera –San Martin eta Talaieta tartean gainontzeko kale zatia konpontzen ari direlako gaur egun– kaleetan. Gainera, lan horiek baliatuko dituzte saneamendu eta argi sareetan beste hobetze lan batzuk egiteko. Jarduera horren helburua da, espaloiak goitik behera berriztatzea, oinezkoen segurtasun maila areagotu aldera, Hirigintza arloko zinegotzi Joseba Arregik aipatu duenez. Espaloietan lanak egiteaz gain, Iturribiden, Malakate parke ondoan dagoen tartean, “plataforma bakarra egingo da oinezkoari lehentasuna eman eta kalea parke eremu barruan sartzeko”. Unbe eta Urduña kaleen artean dagoen parkeari dagokionez, azkenik, zorua zolatu eta hiri altzariak eta argiztapen berria ipiniko dute, dagoen arbola kopurua aintzat hartuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun