Auzotarrek 1.071 sinadura aurkeztu ostean, Algortako Ereaga hondartza alboko eraikina -egungo La Terraza jatetxea- bota eta berria egiteko prozesu administratiboa behin-behinean gelditzea erabaki zuen, abenduan, Getxoko Udalak. Hala ere, EAJk eta PSE-EEk 2009rako adostutako aurrekontuetan, egitasmoa "bere horretan" sartu dutela salatu du gaur Getxoko PPk. Marisa Arrue popularren bozeramaileak kritikatu duenez, "nahiz eta aurretik proiektuaren aurka agertu arren, zuzenketarik egiteko kapaz ez da izan" Luis Almansa buru duen alderdiak. Hori dela eta, "berriro ere EAJren nahiei men egitea" leporatu diote PSE-EEri popularrek. Arruek iragarri duenez, aurrekontuei zuzenketak aurkeztuko ditu Getxoko PPk, eraikinaren gaineko ideia lehiaketa zabaldu eta konpondu dezaten. Otsailaren 27ko udal batzarrean eztabaidatuko dituzte horiek. Argazkian, Marisa Arrue gaurko prentsaurrekoan.
Getxoko Udalak Ereaga hondartzan dagoen turismo bulegoa berriki itxi izanagatik ere kexu agertu da Alderdi Popularra. "Azul marino" izeneko etxea erortzear dagoela adierazi eta Aiboako Getxo II institutua izandako eraikinera aldatu dute. "Ez ote zegoen lokal hoberik Bizkaiko Zubitik edo herri guneetatik gertu?", adierazi du Arruek. Turismo bulegoa "hondatzen utzi dutela" salatzeaz gain, "bunkerra eraikitzea beharrezkoa dela esateko ez ote duten horren azkar itxi" susmoa dauka Getxoko PPren bozeramaileak. Turismo bulegoa ez ezik, taberna-jatetxea eta ondoan dauden sorosle eta hondartzainentzako tokiak ere jarri nahi ditu Udalak, sotoa eta lehenengo solairua edukiko dituen eraikinean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun