Etxerik gabe geratutako Altzagako bizilagunei konponbidea ematea eskatu dute Erandioko PPk eta PSE-EEk

Etxea utzi behar izan zuten Altzagako 39 familiei, horietara bueltatu arte ostatu emango dietela "bermatzea" exijitu dio Mikel Arieta-Araunabeña alkateari Erandioko PPk. Javier Ruiz popularren tokiko bozeramailearen arabera, "bete dezakeen ez dakienez, ezin duela hitzeman" erantzun zion azken udal batzarrean agintariak. Tokiko Gobernuaren "ezintasuna" ikusita, auzian esku hartzeko eskatu die Eusko Jaurlaritzari eta Aldundiari Alderdi Popularrak. Horrekin bat ere badator Erandioko PSE-EE. Hala ere, Juan Otermin aipatu alderdiko bozeramailearen ustez, "beharrezkoak diren etxebizitzak eraikitzeko epe luzeko mailegua eskatu beharko luke Udalak; eta Jaurlaritzari babesa eskatu, diru hori berreskuratzeko, babestutako etxebizitza sustapenak abian jarri daitezen". Horren arabera, Abaroa enpresak Anton Fernandez kalean eraikitako etxebizitzetatik (argazkian) batzuk eman dakizkieke bizilagunei. Ustez, azken etxe horiek altxatzeko lanek eragin zituzten kalteak kalean geratutako auzokideen pisuetan.