Beste etxe batean ostatu eman diezaiela eskatu dute Gobela ondoko 72 familiek
2009ko ots. 18a, 20:43
Otsailaren 10eko gauean hartu zuten azken sustoa Algortako Salsidu-Zubilleta inguruko bizilagunek. Metro koadroko 15-20 litro euri egin zituen oso tarte labur batean, eta Gobela Ibaiak "ezin izan zuen guzti hori irentsi". Ezbehar handiagorik gertatu ez zen arren, hurrengo goizean mobilizatzeko erabakia hartu zuten auzotarrek. Oraindik daude ikusgai egun horretan leihotik leihora zintzilikatu zituzten pankartak: "Gobela d'Or, ciudad de vacaciones" bezalako leloak irakur daitezke. Salsidu-Zubilletako 80 familietatik 72k joan nahi dute bertatik, auzotarrek euren artean egindako galdeketaren arabera. Horrela jakinarazi dute Uholdeetako Batzorde Berezian, eta Getxoko PSE-EEren eta Ezker Batuaren babesa badaukate. Etxabeetan bizitzeagatik egoera larriagoan egonda, 13 familiari ahalik eta lasterren ostatu ematea eskatu du PPk. Bitartean, "aukera ezberdinak aztertu eta horren arabera erabaki" egingo dutela erantzun die behin eta berriro Landa alkateak. Argazkian, Salsidu-Zubilletako auzokideetako bat urtarrilaren 30eko udalbatzan.Salsidu-Zubilletako auzotarrek idatzi bat aurkeztu dute Uholdetako Batzorde Berezian eta Getxoko Udalean. "Gure asmoa behin betiko irtenbide bat izatea da, batez ere azken hilabeteotan jasaten ari garen uholde-mehatxu ugariak kontuan hartuta. Irtenbide hori auzotarroi Getxon bertan etxebizitza bat eskaintzea litzateke; Mungian ezin den moduan, esaterako", azaldu du Arantza Gutierrez bertoko bizilagunak. Hori dela eta, "Udalaren aldetik erantzun edo konpromisorik ez dagoelako, mugitzen hasi dira. Joan den asteazkenean pankartak jartzen hasi ziren eta inauterietan ere euren protesta kaleratzen saiatuko dira..., eta beste jai-ekitaldi batzuk ere badituzte egiteke. Bitartean, zegoen zaborra kendu izana eskertu diote Udalari, "hamabost egun ondoren" izan bada ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun