Ostiral honetan, otsailak 20, Inauteriak ospatuko dituzte Leioan herri horretako Kultura Topagunearen kideek. Gainera, data eta jaialdia kultur ekimen hutsean geldi ez dadin eta "euskal Inauteriak ezagutarazteko asmoarekin", Lantzeko inauterien kalejira antolatu dute egun horretarako, LKT-tik adierazi dutenez. Leioako Kultura Topagunea herriko kultura talde ezberdinek osatzen dute eta "Inauteriak herritartzeko asmoarekin hurbiltzen" dira aurtengoan. Helburu horrekin, ostiralean Lantzeko Inauterien dantza ikastaroa burutuko dute Euskal Etxeen Plazatik hasita Gure Ohiturak Dantza taldea eta Berbalamiñe Euskara Taldearen eskutik. Halaber, Maritxu Teilagorri txosna batzordeak urtero lez umeentzako gunea antolatuko du, puzgarriak, txotxongiloak, lantzeko mozorroak, jai giroa eta abar izango direla. Azkenik Leioako herritar guztiak gonbidatu dute Inauterietan parte hartzera: "euskal inauteriak ezagutzeko, bildu kultura topagunearekin! Animatu eta parte hartu Leioako Euskal Inauteri herritarretan!". Argazkian, iazko Leioako Inauterien irudi bat.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
