Ereagako eraikinaren proiektua adostu dutenik ukatu dute Getxoko EAJk eta PSE-EEk

2009ko aurrekontuetan, Ereaga hondartza alboko La Terraza jatetxea bota eta erabilera anitzeko eraikina egiteko diru partida izango dela adierazi zuen atzo Marisa Arrue Getxoko PPren bozeramaileak. Hala ere, hori gezurtatu dute EAJk eta PSE-EEk. Joseba Arregi Hirigintza zinegotzi jelkideak adierazi duenez, aurtengo kontuetan "euro bat bera ere ez" da egongo aipatu egitasmoa sustatzeko. Bere hitzetan, proiektua "egokitzen" ari dira, "auzotarren iradokizunak kontutan hartuz". 1.071 lagunek sinatu zuten horren kontra. "Getxo Antzokia edo Begoña gazteluko galerietako egitasmoekin egin bezala, hausnarketa epea zabaldu dugu elkarrekin lan egiteko", gaineratu du Arregik. Bitartean, "La Terraza botatzeko asmoaren aurka epailearen aurrean helegitea aurkeztu duen alderdi bakarra PSE-EE" izan dela gogoratu dio Arrueri Luis Almansa sozialisten tokiko bozeramaileak. Argazkian, La Terraza kafetegia.