Gutierrez 1984ko otsailaren 25ean hil zuen frankotiratzaile batek, errefuxiatu talde batekin Zuberoako Idauze-Mendi udalerriko baserri batean zegoela. Euskara ikasketen atsedenaldian baserriaren atarira irten zenean buruan tiro bat jaso zuen eta bertan gelditu zen hilik. Hilketa GALek erreibindikatu zuen, baina orain arte inor ez da akusatua izan bere heriotzagatik. 29 urte zituen leioaztarrak. Argazkian, igandeko omenaldiko kartela / Etengabe.
2003ko azaroan, Guardia Zibilak terrorismoari buruz abiatu berria zuen webgunean, lehenengo aldiz onartu zuen Estatu espainiarrak Gutierrez eta beste 27 eukal herritarrak "GALen ekintza terroristen" biktimak izan zirela. El Mundo egunkariak hori salatu eta ordu batzuetara aipatu zerrenda kendu egin zuten. Eugenio Gutierrez Leioan jaio zen 1955ko urtarrilaren 14an eta ETAko zuzendaritzako kidea izatea leporatu zioten.
Amnistiaren Aldeko Mugimenduaren irakurketa:
PSOE alderdi politikoa izan zen GAL taldea sortu eta bere bidez euskal militanteen aurkako gerra zikina bultzatu zuena. GALen bidez estatu terrorismoa burutu zuen PSOEren gobernuak, guztira 23 pertsona hil eta 60 baino gehiago zauritu zituztelarik. Estatu terrorismoaren aldeko hautua egin zuen PSOEren gobernuak, eta bertan zuzenean parte hartu zuten gaur oraindik orain alderdian ardura handiak dituzten politikariek. Ezin dugu ahaztu PNVk garai hartan GALen jardueraren aurrean izandako jarrera hipokrita zein izan zen, inolako arazorik gabe PSOErekin esku esku elkarlanean aritu baitzen GAL euskal herritarrak hiltzen ari zen momentuetan.
PSOEren gobernua izan zen GAL sortu eta bultzatu zuena, PNVren konplizitatearekin. 25 urte geroago PSOEren gobernua da GALek hildako herritarrak omentzea debekatzen duena PNV konplizitatearekin.
25 urte geroago, PSOEren gobernuak Euskal Herriaren aurkako gerra estrategiarekin bete betean jarraitzean duela agerikoa da. GALen garaiak atzean gelditu baziren ere oraindik orain tortura, ilegalizazioak, espetxe politika ankerra, atxiloketa masiboak eta erabateko jazarpena erabiltzen ditu PSOEren gobernuak herri honetako sektore oso baten aurka, GALekin zituen helburu berdinen bila.
Herri honetako gertaera ilunenak ezabatu nahi dituzte modu honetako debekuen bidez. Errepresioaren memoria ezabatu nahi dute, eta horri erantzuten dio omenaldiak debekatzeak edo errepresioak hildako euskal herritarren izenak daramatzaten plaza eta kaleei izena aldatzeak.
Errepresioaren aurkako borrokan garrantzia berezia hartzen du errepresioaren memoria egiteak. Gure aldetik dei egiten dugu errepresioaren aurkako borrokan jarraitzera, besteak beste errepresioak hildako euskal herritarrak oroituz.
Uribe Kostako Amnisitiaren Aldeko Mugimenduak jakinarazi duenez, etzi, igandean egitekoak diren Eugenio Gutierrez Salazar “Tigre” omentzeko ekitaldiak bere horretan mantenduko dituzte, Espainiako Auzitegi Nazionalak debekatu dituen arren. Horrela, orain dela 25 urte GAL talde terroristaren biktima izan zen errefuxiatu leioaztarra oroitzeko eguerdiko 13:00etan jarri dute lehenengo hitzordua Leioako hilerrian, lore sorta eskaintzeko. Ordu erdi beranduago, Tigre plazan, oroitarrian lore eskaintza jarri eta ekitaldi politikoa dira egitekoak. Ekitaldi horiek egitea debekatu zuen atzo Espainiako Auzitegi Nazionaleko 6. Instrukzio Epaitegiko Eloy Velasco magistratuak, Gutierrez ETAko kidea zela, deialdiaren antolatzailea Askatasuna omen dela eta "Tigre" omentzekotan "biktimak makurrarazi eta terrorismoaren gorazarre" egingo litzatekeela aitzakiatzat hartuta. Erabaki hori Dignidad y Justicia eskuin muturreko taldeak eskatuta hartu zuen. Gainera, Velascok Herrizaingo Saila, Ertzaintza, Guardia Zibil eta Espainiako Polizia Nazionalari bere autoa betearazteko behar diren neurriak hartzeko agindu die. Era berean, debekua gainditzeko gerta litezkeen delituei aurrea hartzeko eta edozein gertaeraren berri emateko agindua eman die. Argazkian, Eugenio Gutierrez zena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun