Amnistiaren Aldeko Mugimenduaren salaketa:
Bai ertzaintzak, bai Guardia Zibilak, bai espainiar Polizia Nazionalak asko ugaritu dituzte beraiek "antiterrorista" deituriko errepideetako kontrolak. Berauetan, burua estalirik, metrailetak eskuan eta armaz leporaino josita dauden poliziek herritarrak gelditu, nahi duten denborarako erretenitu, identifikatu eta galdekatu egiten dituzte."Antiterrorista" deituriko jarduera hauek berauek dira gure ustez herritarren artea beldurra eta terrorea zabaltzen dutenak, areago gorputz errepresibo hauek erabiltzen duten bortizkeria poliziala aski ezaguna delako, eta milaka direlako bizkarrean daramatzaten tortura salaketak.
Espainiar errepresio estrategian bete betean parte hartzen duten milaka poliziek lan egiten dute Euskal Herrian, errepresioaren bidez herro honetako sektore bat isiltzeko, ezabatzeko. Salagarria deritzogu ertzaintzak guardia zibilarekin eta espainiar poliziarekin burutzen duen elkarlana, argi baitago errepide kontrol basati hauek guztiak elkarrekin koordinatzen dituztela, euskal herritarrak basatiki torturatuak diren polizia operazioak elkarrekin koordinatzen dituzten modu berean.
Herri honetara bakea eta konponbidea ez da polizia gehiagorekin, errepresio gehiagorekin etorriko, demokrazia gehiagorekin baizik. Eta Euskal Herriak bizi duen polizia okupazioak ezin esan konponbidera hurbiltzen gaituenik.
Guardia Zibilak gizonezko bat eraman egin du gaur goizean Metro BIlbaoko bagoi batetik. Atxiloketaren lekuko batek UKBERRI.NETi adierazi dionez, gertaera goizeko 11:30ak aldera jazo da, Metro Bilbaoko Gobela geltokian. Bat-batatean "oso urduri" zeuden Guardia Zibileko bost polizia sartu egin dira Gobelan gelditu den trenean eta "30 edo 40 urte, askoz jota" zuen gizonezko batengana zuzendu dira atoan. Gizonaren motxila miatu eta trena non hartu duen galdetu diote indar armatuko kideek. Gizonak "Sopelan" erantzun eta eraman egin dute. Ondoren, trena jarraitu egin du Etxebarrirantz. Albiste agentziek eta Amnistiaren Aldeko Mugimenduak ez dute inolako atxiloketaren berri. Bestalde, gaur goizean ere, Sopelan egin du errepide kontrola Guardia Zibilak. Aurreko egunotan, ordea, Ertzaintza izan da kontrol gehienak egin dituena eskualdean, lekukoek adierazi dutenez. Urduliz, Algortako Euskal Herriko etorbidea, Areetako Zugatzarte etorbidea, Leioa eta Berangon kontrol armatuak jarri dituzte ertzainek. Pasa den ostegunean, "armaz leporaino jositako poliziek ezarritako kontrolak asko ugaritu direla" salatu zuen Amnistiaren Aldeko Mugimenduak. Argazkian, Guardia Zibilaren kontrol bat / Askatu.org.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun