Itzubaltzeta gaztetxeari prezioa jarri diote EAJk eta PSE-EEk

Milioi bat euro balio du Itzubaltzeta gaztetxeak, Getxoko PSE-EEren eta Euzko Alderdi Jeltzalearen arabera. Horrela jakinarazi du Luis Almansak zuzentzen duen alderdiak otsaileko informazio buletinean. "Socialistas de Getxo / Getxoko Sozialistak" aldizkaritxoaren arabera, PSE-EEk Getxoko Udalaren 2009ko aurrekontuetan sartu dituen 37 proposamenen artean jasotzen da "Errekaganeko tailer zaharretako lurren desjabetzea", ondoan 1.000.000 euroko kopurua bideratzea aurreikusten dutela zehaztuta. Itzubaltzeta gaztetxea, Izenik Ez eta beste musika taldeen entsegu-lokala, hainbat garaje, gazte koadrilen lonjak eta bestelako lokalak beraz, 2009an desjabetzeko proiektua dute. URA Eusko Jaurlaritzaren agentziak ureztatzeko gune bezala aurreikusita du Errekagane kaleko zati hori eta eraikinak botatzea jasotzen du Gobela ibairako plangintzaren zirriborroetan. Udal agintariek, berriz, dagoeneko esanda dute bertan eraikitzerik ez dagoenez lurzorua kirol azpiegiturak jartzeko erabiliko dutela. PSE-EEk aurrekontuetan sartutako aldaketa guztiak aldizkarian (pdf) ikus daitezke. Argazkian, Itzubaltzeta gaztetxeko hainbat lagun, 2008ko irailaren 30ean, gazte zentro sozialaren laugarren urteurrenean.