Getxoko Behargintzak martxan jarritako etxez etxeko laguntzaile ikastaroan parte hartuko duten lagunetatik, gutxienez %60k edukiko dute ibilbide osoa egin eta lanean hasteko aukera, udal arduradunek gaur zehaztu dutenez. Horretarako, Lagunduz enpresa taldearekin sinatu du lankidetza hitzarmena tokiko erakundeak. Guztira 12 lagun, 10 emakumezko eta 2 gizonezko, ikastaroa egiten hasi dira eta aste honetan hezkuntza teorikoa lantzeari ekingo diote. Ikastaroak hezkuntza teorikoko 290 ordu eta hezkuntza praktikoko 120 ordu ditu. Azken eskola horiek maiatzean emango dituzte eta, ekainerako, lan merkatura ateratzeko prest egongo dira parte hartzaileak. Gehienbat adinekoei eta ezintasunen bat dutenei egiten die arreta Etxez Etxeko Laguntza Zerbitzuak. Argazkian, gaur sinatu dute hitzarmena Imanol Landa alkateak eta Carlos Catarain Lagunduz enpresa taldeko bozeramaileak.
“Langabezian egon eta lana topatzeko zailtasun handiak dituztenek lana aurkitzea da Getxoko Udaleko Enplegu eta Ekonomi Garapeneko Zentroaren helbururik nagusiena eta horren barruan kokatzen da gaur goizean Lagunduz taldearekin sinatutako hitzarmena”, azaldu du Imanol Landa alkateak. Horregatik, "oso positibotzat" jo du lortutako akordioa udal agintariak, “pertsona batzuek lan merkatuan sartzea errazteko duelako”. Aldi berean, mota horretako ekimenean enpresa gehiagok parte hartzea eskatu du, "udalerrian birgizarteratzearen eta ekonomi sustapenaren alde egiteko". Getxo udalerrian du egoitza Lagunduz taldeak eta gestio zerbitzu, aholkularitza eta pertsona nagusiak artatzeko hornitzaile garrantzitsua da, bai maila publikoan, bai pribatuan. Besteak beste, Getxoko Udaleko Gizarte Zerbitzuetako etxez etxeko laguntza zerbitzua eskaintzen du. Horren bozeramale Carlos Catarainek esan duenez, “oso erraza izan da Getxoko Udalarekin hitzarmena lortzea, birgizarteratzearen aldeko apustua benetakoa baita.”
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun