IAk irakurritako adierazpena:
UPV krisian dago!
Ia 30 urte hauetan hamaika izan dira euskal ikasleok unibertsitate honen eta berau kudeatu duten agintarien eskutik bizi izan ditugun eskubide urraketak. Euskaraz ikasteko ezintasuna, kontrol soziala, ikasleon aurkako neurri antidemokratikoak, inposaketak… Azken urte hauetan gainera, komunitate unibertsitarioarekin eztabaidatu gabe eta ikasleon hitzari muzin eginez, Europatik datozen aire neoliberalei jarraituz goi mailako hezkuntza goitik behera eraldatuko duen prozesua, Bologna Prozesua alegia, modu ezberdinetan inposatzen ari zarete.
Hauteskunde aro batetik atera gara berriki. Kolore ezberdinetako mozorro eta maskaraz betetako hauteskunde arotik. Zuk zeuk, euskaldun eta demokratiko gisa saldu zenigun zure burua. Beste batzuk gainera, Barack Goirizelaia zinela sinestarazi nahi izan ziguten. Unibertsitate hau benetan euskaldunduko, demokratizatu eta herriratuko zenuelakoan unibertsitate honen salbatzaile gisa aurkeztu zintuzten. Zuk jantzi zenuen mozorrorik politena eta zu atera zinen garaile Iñaki.
Baina azkar erantzi duzu mozorroa. Egindako adierazpenek eta hartutako erabakiek, agerian uzten dute espainolek eta enpresariek diseinatutako unibertsitate ereduarekin jarraitzeko asmoarekin bat egiten duzula.
Baina ikasleok argi geneukan eta daukagu. Zurekin eta zuk bultzatutako neurriekin UPV krisian dago! Eta ikasleok krisian bizitzera kondenatzen gaituzu! Eskaleen antzera egunero euskaraz ikasteko aukera eskatu behar dugu, gure hitza errespetatua izatea eskatu behar dugu, euskal herritar gisa herri jakintza enpresen interesei gailentzea eskatu behar dugu.
Aski da! Nazkatuta gaude! Benetako unibertsitate euskaldun, demokratiko eta herriaren zerbitzura egongo dena behar dugu! Zuk bide honetan pausurik emango ez baduzu guk emango dugu. Orainarte bezala, bestelako unibertsitate eredu bate alde lanean jarraitzeko hautua egina daukagu euskal ikasleok. Beste batzuk krisi ekonomiko mundiala eragin duten enpresekin elkarlanean jarraitzen duzuen bitartean guk Euskal Herriak behar duen unibertsitatea eraikiko dugu.
Ikasle Abertzaleak (IA)
Gaur, hilak 26, ostegunarekin, Euskal Herriko Unibertsitateko (EHU) Klaustroak batzarra egin du Bilboko Ingeniaritza Goi Eskola Teknikoko areto nagusian. Goizeko 10etan hasi da bilera eta, ordurako, 50 bat ikasle zegoen batuta San Mameseko fakultate kanpoan, Ikasle Abertzaleek (IA) egindako deialdiari erantzunez. "Bolognaren gainetik, ikasleria eraikitzera!" zioen pankarta atzean elkartu dira ikasleak, eta "Beste unibertsitate eredu baten alde", "Ezin dut nire karrera osoa euskaraz egin", "Interes merkantilistak herri jakintzaren gainetik jartzen dituelako" eta "UPV krisian dago" irakur zitezkeen kartelak eduki dituzte eskuetan. Horrez gain, klaustrora sartu diren IAko ordezkariak eskalez jantzita sartu dira, kartoi zatietan aurrez aipatutako esaldiak idatzirik zituztela, "EHUk bizi duen krisiak denoi eragiten digula" adierazi nahian, eta beste unibertsitate baten aldeko aldarrikapena zabaltzeko. Ikasle ordezkaritzen bozketak egin ostean, eta batzarra bukatzear zela, IAko Bizkaiko eledunak komunikatua irakurri du, eskalez janztearen arrazoiak azalduz, eta euren aldarrikapenak entzun araziz. Ikasle Abertzaleek salatu dutenez, "eskaleen antzera egunero euskaraz ikasteko aukera eskatu behar dugu, gure hitza errespetatua izatea eskatu behar dugu, euskal herritar gisa herri jakintza enpresen interesei gailentzea eskatu behar dugu". Argazkian, Klaustroko gaurko bileran protestan ibili den ikasleetako bat. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun