Hala ere, dagoeneko Itzubaltzetan hainbat obra egiten ari direla nabarmendu dute udal agintariak. Besteak beste, Errekagane kaleko erreforma -amaitzear- eta Luis Lopez Oses kalea eta Errekagane parkea egokitzeko lanak -martxoan esleituko dira- jarri ditu adibide bezala Landak. Horretaz gain, Chavarri Zuazo parkeko obrak eta Gobela kiroldegian betetako aparkatzeko 270 plazak ere aipatu ditu. “Inolako zalantzarik gabe aspaldi Romo auzoan egin den erreforma urbanistikorik garrantzitsuena da”, alkatearen hitzetan.
Errazago ibiltzeko kaleak
Ezekiel Agirre, Aurrezki Kutxa, Kalamua eta Gobelondo kaleetan espaloiak zabalduko dituzte errazago ibili ahal izateko. Aurrezki Kutxa kalea egokitu egingo dute oinezkoari lehentasuna emateko eta Gobelondo kaleko zati bat -Aurrezki Kutxa eta Kalamua tartean- oinezkoentzako gune bihurtuko dute. Bitartean, Ezekiel Agirren 3 metro zabalerako espaloiak ipiniko dituzte, ilarako arbolekin, eta Kalamuan espaloiak zabalduko dituzte (2 metroraino); baita zoladura berria jarri dute. Era berean, saneamenduko estolda nagusia zaharberrituko dute. "Horren eraginez, Santa Eugenia plazan eta Kresaltxun ur putzu handiak sortzeko arriskua behin betiko desagertuko da", udal arduradunen hitzetan.
Alkateak aurreratu du obrek aparkaleku kopurua gutxituko dutela. Horrek eragin ditzaketen kexuen aurrean, Santa Eugenia eta Mesedeetako aparkalekuez gain, Udalak egungo agintzaldian Gobela kiroldegiko parkinga zabaldu duela aipatu du Landak. Udal agintariak azaldu duenez, “Romoko kaleetatik 282 auto atera ditugu. Halaber, aurreikusita dago Leioako Udalak Pinuetan aparkatzeko 400 plaza jartzea. Proiektu horretan elkarlanean jardungo dute Leioa eta Getxoko Udalek. Edozelan ere, formulak aztertzen jarraituko dugu arazoari irtenbide bat eman aldera”. Azkenik, lanak eragin ditzaketen eragozpenen aurrean, "pazientzia eta ulerberatasuna" izateko eskatu die auzotarrei Landak.
Itzubaltzeta / Romon, Ezequiel Agirre, Aurrezki Kutxa, Kalamua eta Gobelondo kaleetan espaloiak zabaldu, Xake plaza ondoko aparkaleku eremua egokitu eta saneamenduko estolda nagusia zaharberrituko ditu Getxoko Udalak. Espaloiak zabaltzen 605.000 euro gastatuko dituzte, Espainiako Gobernuak onartutako tokiko erakundeei laguntzeko funtsetik, hain zuzen. Lanak urtea amaitu aurretik bukatuta egotea espero dute. Estolda nagusia berritzeko proiektuak, berriz, 1,3 milioi eurotik gorako aurrekontua dauka eta laster aterako dute enkantean. Imanol Landa alkateak adierazi duenez, hirigintza jarduera horrek “Romok Getxo udalerriko beste auzo batzuk gozatzen duten kalitatezko urbanismo atseginarekin behin betiko bat egitea ekarriko du. Auzotarren bizimodua nabarmen hobetuko du, batez ere mugitzeko zailtasunak dituzten pertsonena, kaleak gozatu ahal izango dituztelako”. Argazkian, elbarritu bat Ezekiel Agirre kalean barrena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun