Era berean gure jendartean ere kontuak ez dira samurragoak, ezen euria eta hotzaren antzera gure lurra menperatu nahian dabiltzan horiek Euskal Herria neguko lozorro luzean iraun dezala nahi baitute, eta herriak antolatutako lur esnatze saio oro zapuztu nahian baitabiltza. Aurtengo neguan euriak eta hotzak egin duten legez, gure lurraren berpizkundea atzeratzen dabiltza, milaka urteetan gainean izan dugun eguzkiaren ordez hauteskunde kanpainan alegiazko solariumak eta behin behineko bero artifiziala agintzen ari zaizkigula, horiek guztiak behin betiko eguzkia bera ordezkatuko dutelakoan. Enpeinu horretan ibiltzeak, ondorio latzak ekartzen dizkigu: gure arteko hamaika gizaseme neguaren halabeharreko luzapena pairatzen ari direla ikustea besterik ez dago, lur hotz eta idorretan sortutako balizko gizalegearen izenean ziega ilunaren eta bazterkeriaren isolamendura kondenatuak direlako, horrekin eguzkia eta lurra ahulduko dutelakoan.
Eguzkia eta lurra, ostera, indartsuegiak dira akabatzeko, eta oraindik indar nahikoa dute aspaldi ospel eta hotz dugun herri hau epeltzeko, agintari faltsu horiek gura izan ala ez. Kanpamartxo hortxe dago, eta naturaren ibilbidea oztopatzeko saioak alferrikakoak diren neurri berean dira alferrikakoak gure jendartean iluna eta hotza mantendu gura izatea. Egun epel gozoak ditugu gure zain, baina hori bai, igarotzea zilegi den legezko ate horietatik barik, salto egitea debekatzen diguten horma horien gainetik pasatu beharra dugu lehenbizi, ate horien atzean eguzkia baino solariumaren bero kaltegarri eta behin behinekoa baino ez baitugu, gaurko ogia eta biharko gosea alegia.
Eta martxoaren batean hormari salto egitea proposatzen dizuet, menperatzaile horiek (kanpokoak zein barrukoak) inposatu gura dizkiguten ate apaindu horiei muzin eginik, modu horretan soilik izango baitugu kanpamartxo duina. Lurra esna dezagun, eta askatasun eguzki berriak lur jipoitu honi loratzeko eta fruituak emateko indarra eman diezaiola.
Josu Gotzon Landeta (Irakaslea)
Negu partean, Euskal Herriko herri eta hirietan santa eskeko ekintza ugari burutzen dira, gure lurra esnatzea helburu dutenak, gure lurra neguko lozorrotik atera eta udaberriko indar berriaz txertatzeko alegia. Urteen poderioz kristau tradizioak inposatutako santu izen batzuk tartekatu zaizkigu, baina amnesiaren harean apur bat arakatuz gero funtsezko arrazoia zutik dirau, eta gure makilek kantuaren erritmoa markatzea baino zerbait gehiagotarako erabili ohi ditugula ondorioztatzen da. Aurten negu luze eta gogorra suertatu zaigu, egunik gehienetan atertu ezin zuen euri jasaren jipoia jasanik, edo egun hotz eta ospel samarretan murgildurik. Santa eskeko ekintzetan giroa epeltzeko ahaleginak egin ditugu, baina badirudi aurten ama lurrak lo sakonegia duela biziberritzen hasteko. Eguzkiaren presentzia sumatzen hasi da, baina antza ez da nahikoa gure landa basatsu eta urez beterikoak lehortzeko, ura eta hotzaren erasoak gogorregiak izan ei direlako; eta giroa gaur ez da askoz samurragoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun