Igande honetan, Araba, Bizkaia eta Gipuzkoako Legebiltzarrerako hauteskundeen karietara, hauteskunde gaueko irratsaio berezia eskainiko du Koska irratiak, Info7ri ahotsa emanez. Gaueko 7:45etik aurrera, Ekhiñe Atorrasagasti eta Martin Garitano kazetariek aurkezturik, zuzen zuzenean jarraitu ahalko dira emaitzak herrialdez herrialde eta herriz herri. Gainera, analista talde zabala izango da estudioan hauteskundeen emaitzak aztertzen. Besteak beste, Maite Ubiria kazeta.info-ko erredaktorea, Iñaki Soto "Gara" egunkariko iritzi saileko arduraduna eta Dani Gomez Catalunya Radioko bidalia. Interes puntu nagusietan ere bidali bereziak izango ditu irratiak, alderdien iritziak jasotzeko eta antolatutako ekitaldietako giroaren berri jasotzeko. Bitartean, Gorliz irratiak 19:50ean abiatuko du saioa, Alain Lejarraga eta Iraide Talaverak aurkeztuta. Argazkian, Sopelako Ander Deuna ikastolako DBHko 1. mailako ikasleak 2006ko udan, Koska irratia ezagutzen.
"Bi eratara aurkeztuko ditu irratiak hauteskunde emaitzak, entzuleei argazki ahalik eta osatuena eta errealena eskaintze aldera: hautesle-erroldaren arabera (bozkatzeko eskubidea dutenen arabera alderdi bakoitzak, abstentzioak barne, zein babes duen ikusteko); eta parte hartzearen arabera. Ganbara ofizialaren osaketa nolakoa izango den eta herritarren botoen arabera nolakoa litzatekeen ere islatuko da", azaldu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun