Oraindik orain Etxebizitza sailburua den Javier Madrazo ere "Demokrazia Euskal Herriarentzat!" oihu artean hartu dute zenbait gaztek. Hala ere, Ertzaintzak ez die horiei gelan sartzen utzi. Bilboko Errekalde auzoko hauteslekuan botoa eman du Ezker Batuaren ordezkariak. Aintzane Ezenarro Gipuzkoako Aralar zerrenda buruak, berriz, goizeko 11:00etan botoa eman du Getariako ikastetxea batean, ezker abertzaleko talde batek euren aldarrikapenak azaltzen zituzten kartelak isilean erakutsi dituzten bitartean.
Gainontzeko hautagaiak lehenengo orduan joan dira bozkatzera: Juan Jose Ibarretxe (EAJ) bere emaztearekin bozkatzera joan da goizeko bederatzi t'erdietan Laudioko La Milagrosa Ikastetxera; Antonio Basagoiti EAEko PPren presidente eta lehendakarigaiak emaztea alboan zuela bozkatu du 9:15 inguruan, Bilboko Cervantes ikastetxean; Unai Ziarreta Eusko Alkartasunaren lehendakarigaia familia aldamenean zuela iritsi da hamarrak inguruan Mungiako Erretiratuen egoitzara botoa ematera. Arnaldo Otegik Elgoibarren eman du botoa goizean, D3Mren aldeko boto-papera eskuetan zuela. Ezker abertzaleak Euskal Herriarentzat alternatiba integrala baduela nabarmendu du.
Eitb.com-ek sareratutako bideoa:
Patxi Lopez PSE-EEren hautagaia goizeko 10ak aldera joan da bozkatzera, Bilboko Iruarteta ikastetxe publikora, bere emazte Begoña Gil lagun zuela. "Demokrazia zero" eta "Salbuespen egoerari stop" leloak irakur zitezkeen kartelak eskuan zituztela, korridorean bertan egin dio harrera lagun talde batek. Bilboko udaltzainak gogotsu aritu dira horiek sakabanatzen. Hala ere, bozkatu behar zuen gelan bertan, beste talde bat zeukan zain Lopezen. Botoa ematen ari zen bitartean, "PSOE, GAL, berdin da", "Non daude gure eskubideak" eta "Patxi, faxista, zu zara terrorista" oihukatu diote PSE-EEren hautagaiari. Ondoren, gaurkoa ''biolentzia baztertzeko eta etorkizun aske bat aukeratzeko eguna dela'' adierazi du Lopezek. Zentzu horretan, ''boto demokratiko bakoitzak biolentziaren eta nahi ez dugun herri baten planteamendua inposatu nahi digutenen gaitzespena suposatuko duela'' adierazi du. Argazkian, Patxi Lopez hauteskunde kanpainan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun