Alerta honi, datozen egunotarako iragarritako euria dela eta emandako abisua gehitu behar zaio. Aurreikuspenen arabera, bihar (asteazkena), hilak 4, lurralde osoan euri ertainak botako ditu eta, egunaren amaieran, Kantauri isurialdean ekaitzak jo eta txingorra botako du. Iragarpen hau (alerta laranjan) ostegunetik larunbatera arte luzatuko da; izan ere, 60 litrotik gora bota ditzake 24 ordutan Kantauri isurialdeko hainbat puntutan.
Halaber, elur kota 800-900 metroren bueltan kokatuko da bihar (asteazkena) eguerdian, eta 600-800 metrora jaitsiko da azken orduetan. Ostegunean, hilaren 5ean, elurra 500-600 metrora hel liteke, eta baliteke ekaitzak izan ohi diren tokietan 400 metrora jaistea.
Herrizaingo Sailak, SOS Deien bidez, alerta ohar bat helarazi die udalei, aldundiei eta Eusko Jaurlaritzari berari ere, larrialdietarako eta onura publikoko zerbitzuak jakinaren gainean eta indartuta egon daitezen. Komunikatu horretan, Herrizaingo Sailak ohar berezi bat sartu du kostaldeko udalek jarraitu behar dituzten aholkuak zehaztuz, prebentzio neurriak indartu ditzaten.
Itsas denboraleak larunbatera arte jo lezake. Gainera, arrisku honi, ostegunetik aurrera euri gogorrak izateko dagoen arriskua gehitu behar zaio. Iragarpen hauek berretsi egiten badira, Herrizaingo Sailak ohartarazpen berri bat helaraziko lieke herritarrei, eta alerta egoerari eta larrialdi zerbitzuen indartzeari eutsiko lieke.
Bihartik, asteazkena, aurrera itsas denboralea eta euria izango direla ohartarazi eta alarma laranja piztu du Herrizaingo Sailak. Javier Balzak zuzentzen duen Sailak zabaldu duenez, "bihartik aurrera itsasora haizea eta euria ekarriko dituen denborale bat helduko da eta, gainera, datozen egunotan, euria botako du eta elur kota 600 metrora jaitsiko da". Hala, babes neurriak indartzea eta itsasoan arrisku jarduerarik ez egitea gomendatu du Herrizaingo Sailak, baita errepide bidezko joan-etorriak saihestea ere, eguraldiak txarrera egiten duenean. Euskalmet agentziaren iragarpenen arabera, arrisku maila laranja da bihartik (asteazkena) aurrera izango diren olatuen altuera dela eta; hain zuzen, 1-1,5 metroko olatuak espero dira goizean, 3,5 metrokoak eguerdian, eta 6koak egunaren amaieran. Ostegunean, 5,5-6 metroko olatuak izatea aurreikusi dute, eta goizean zehar 7 metrokoak ere izan litezke. Argazkian, abisuak gogorapen txarrak ekarriko dizkie Zubileta, Fadura, Neguri Langile eta beste hainbat lekutako auzokideei.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun