Astelehenenan izango dira hamar urte Irantzu Gallastegi kartzelaratu zutenetik
Heldu den martxoaren 9an, astelehenarekin, beteko dira hamar urte, Irantzu Gallastegi preso politiko berangoztarra atxilotu eta espetxeratu zutela. Hori dela eta, hilaren 13an, ostiralez, Jose Mari Lorenzo Espinosa historialariak "La era de la independencia" hitzaldia eskainiko du Berangoko Sei-Herri tabernan, 20:00etan. Gallastegik 1994ko azaroan ihes egin zuen, ETAren Bizkaia komandoko ustezko hainbat kide atxilotu zituztenen garaian, eta 1999ko martxoaren 9an atxilotu zuen Frantziako Poliziak, Parisen, ETAko kide izatea egotzita. Geroago, aldi baterako Espainiako Justiziaren esku utzi zuen Frantziakoak berangoztarra, Espainiako Auzitegi Nazionalean epaiketa egiteko. 2003an, berriz ere Frantziara eraman zuten, gelditzen zitzaion espetxe zigorra han betetzeko. Zigor hura osorik bete ostean 2005ko ekainaren 14an estraditatu zuten. Egun, Soto del Realgo (Madril, Espainia) espetxeko amen moduluan daukate, bi urte inguru izango dituen Arane bere alabarekin batera. Argazkian, Irantzu Gallastegi eta Xabier Garcia Gaztelu "Txapote" 2006ko ekainean egin zieten epaiketan / Etengabe.
Espainiako Justiziak, besteak beste, 1993 eta 1999 bitartean, Bizkaia eta Donostia komandoetan aritu izana eta Fernando Mugica Herzog abokatua eta Miguel Angel Blanco Ermuko zinegotzi popularraren heriotzetan parte hartu izana leporatzen dizkio.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun