Uribe Kosta, Txorierri eta Mungialdean azken hilabeteetan ehunaka lanpostu suntsitu direla salatu du Eskumaldeko ELAk, gaur goizean, Espainiako INEM erakundearen Areetako bulego aurrean egindako prentsaurrekoan. Besteak beste, Getxo udalerrian %21 hazi da langabezia, 2008ko otsailetik hona. Leioan, berriz, %28 egin du gora langabetuen kopuruak. Eta Erandion %44. Horren aurrean, ELAko delegatu eta afiliatuak ez dira isilduko. Ohartarazi dutenez, "gure eskubideak aldarrikatuko ditugu, gure lanpostuak defendatuz eta baldintza duinak eskatuz. Krisi hau, ez baitugu geuk sortu; enpresarien irabazi nahi neurri gabeek eta erakundeen utzikeria eta diruzalekeriak baizik". Ildo horretan, "Gobiernos y patronal van de la mano. Aberastasuna banatu!" lelopeko kanpaina abian du ELAk. Besteak beste, martxoaren 25ean, delegatuen asanblada egingo dute Zamudioko Parke Teknologikoan, eskualdeko egoeraren balantzea egin eta euren aldarrikapenak manifestazioan ezagutzera emateko. Argazkian, inguruko hainbat delegatu lagun zituztela, Eskumaldeko ELAko Deiane Arrietak eta Dario Ugaldegurenek eman dute prentsaurrekoa.
Kaleratzeak alde batera utzita, iazko eta aurtengo otsailean sinatutako kontratu kopuruen artean alde nabarmena dago, Eskumaldeko ELAk eman dituen Espainiako INEM erakundearen datuen arabera. Erandion, esaterako, %33 kontratu gutxiago sinatu da; Getxo udalerrian %23 gutxiago; eta Leioan %4 gutxiago. "Esan barik jakina da, sinatutakoak denbora baterako eta denboraldi oso laburrerako kontratuak direla. Horrez gain, eskainitako lan baldintzak prekarioak dira", Deiane Arrietak azpimarratu duenez.
Zentzu bako neurriak
ELAren ustez, patronal eta erakundeek "langileen kontura" amaitu gura dute krisialdia. "Gu ez gara krisiaren erantzuleak. Gure soldaten ez dute ekarri enpresen irabaziak murriztea", kexatu da Arrieta. Bitartean, krisialdiari aurre egiteko neurriak "zentzu bakoak" jo ditu langile erakundeak: "CEBEKetik, Confebasketik, estatuko patronaletik eta Espainiako bankutik esan eta esan dabiltza, kanporatzeak, merketzea edo doako bihurtzea dela krisialditik aise ateratzeko irtenbidea. Baina horrek ez du enplegua sortuko, horrek ez du langileria krisialditik aterako. Ezta erakundeetatik banketxe eta enpresei emandako diru laguntzekin ere. Zentzu bako neurriak dira, eraginkortasunik gabekoak, langileok nabarituko ez ditugunak", azaldu dutenez.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.