Arane eta beste ume presoen eskubideak aldarrikatu dituzte auzokide berangoztarrek

Astelehenean bete ziren hamar urte, Irantzu Gallastegi preso politiko berangoztarra atxilotu eta espetxeratu zutela, eta horren harira herenegun Irantzuren senide eta auzokide bana izan ziren Koska irratiko "Espetxetik At" saioan. Bertan, Gallastegiren historia kontatzeaz gain, Arane bere bi urteko alabak beste umeekin izateko, euskaraz hitz egiteko eta bere hezkuntzarako pairatzen dituen arazoen berri eman zuten. Izan ere, salatu zutenez, ez da kasu isolatu bat eta Euskal Preso Politikoen Kolektiboan "hainbat ama daude umeekin" eta "sakabanatuta daude haien artean". Horren aurka aldarrikatzen dutena da ama presoak "leku berean" batzea. Irantzu eta Arane astelehenean lekuz aldatu zituzten Madrilgo Soto del Realgo espetxetik atera A Coruña aldeko Curtisera, Berangotik 630 kilometrotara. Xabier Garcia Gaztelu "Txapote", Gallastegiren gizona eta Araneren aita, A Lama espetxean dago, Pontevedran. Bestalde, Gallastegiren 10. urteurrena ekitaldien barruan, bihar, ostirala, Jose Mari Lorenzo Espinosa historialariak “La era de la independencia” hitzaldia eskainiko du Berangoko Sei-Herri tabernan, 20:00etan. Argazkian, Irantzu Gallastegi eta Xabier Garcia Gaztelu "Txapote" 2006ko ekainean egin zieten epaiketan / Etengabe.