Delituak delitu, AHTren aurkako mugimenduaren ostean, laster etorriko dira atzetik mugimendu antimilitarista, ikasle mugimendua, euskalgintza… baita horien aurka egin ondoren, “moderatuagoak” liratekeen mugimendu eta alderdiak.
Maldan behera handitzen doan elur bola baita hau, eta ematen du -bola hau bai- joango dela aurrera, beste batzuk ez bezala. Hau ez da mugimendu ekologistari eginiko erasoa, gizarte osoari eginiko erasoa baizik, disidentziarako eta desadostasuna adierazteko tresna den desobedientzia zibilaren etorkizuna baitago jokoan.
Hobe genuke, askatasun zibilen krisi honetan, Martin Niemöller-en poema famatua gogoratu. McCarthy eta Lancre hilak dira jada, baina sorgin-ehiza hasia da. Denok gara sorgin, denok terrorista.
Mikel Iturbek blogari getxoztarrak atzo Hamahiru.org bere bitakoran argitaratutako artikulua
"Berria"n izan nuenean honen berri, aho bete hortz lotu nintzen: “Ertzaintzak agindu du terrorismotzat jotzeko AHTaren aurkako ekintzak“. Jada, de facto moduan kontsidera zitekeena, de jure da. Zorigaiztoko gatazka armatua darabilte aitzakia merke modura edo, hobeki esanda, talde terrorista baten jarduera armatuak, gizarte mugimendu anitza kriminalizatzeko -eta kriminalizazio hori guztiz bidezkotzat jotzeko-. Jauzi kualitatiboa eman du Neba Handiak. Berdin dio Inazio Uriaren hilketaren ostean, AHTren aurkako asanbladak ETAri gauzak argi azaldu izana. AHT eraiki behar da, ona delako, eta disidentzia oro (zibil, armatu, handi, txiki…) terrorismoa da, zilegitasun osoz hornituz euren burua terrorista maltzur eta ume jatunei aurre egiteko. Eta zer izango da orduan AHTren aurka dagoen batek bere iritzia adieraztea, terrorismo apologia? Argazkian, ertzainak gazte bati oldartzen pasa den urtarrilaren 17an Urbinan egindako manifestazioan / AHT Gelditu! Elkarlana.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun