Udal arduradunek, kirol taldeek jokatzen dituzten lehiaketa ofizialak laster amaituko direla baliatuko dute kaltetuta geratu ziren instalazioak konpontzeko. "Horiei esker normaltasun osoz erabili ahal izango dira", aipatu dutenez. Hain zuzen ere, konpontze eta atontze lan horiek, Fadurako estalpeko kiroldegi pista, atletismo pista eta errugbi zelaian egingo dira. Halaber, bertako batzartegi nagusia, atari aldea eta bezeroen arretarako gunea ere egokituko dituzte.
Kirol eskolak
Bestalde, Kirol Arloaren aurtengo ekitaldirako beste helburu nagusietako bat izango da udal kirol eskolak zabaltzea "erabilera gutxikoak" diren kirol modalitateetan eta, hartara, laguntza handiagoa behar dutenetan; hala nola, errugbia, hockeya eta arraunketa. Era berean, ahalegindu egingo dira, behar beste, aurtengo denboraldian sortutako futbol eskola sendotzen.
Horren haritik, Udalaren asmoa da, udaldia baino lehen, dagozkion taldeekin hitzarmenak sinatzea aipatu eskolak zabaldu ahal izateko hurrengo denboraldian. Kirol zinegotzi Alvaro Gonzalezek azaldu duenez, “eskola hauen bitartez kirolarien parte hartzea bermatu nahi dugu edozein kirol modalitatean 12 urte bete arte. Hortik aurrera kirol federaturako jauzia egin dezakete”.
Getxoko Udalak lau milioi euro zuzenduko ditu aurten Getxo Kirolak erakunde autonomoaren instalazioak konpondu eta egokitzeko, pasa den ekaineko uholdeen eraginez egoera txarrean geratu baitziren. Kirol Arlorako 2009ko aurrekontua hamaika milioi eurokoa izango da guztira, gaur eskainitako prentsaurrekoan, Imanol Landa alkateak aurreratu duenez. Aipatu lau milioiez gain, milioi bat inguru kirol taldeen ohiko diru laguntzetara eta kirol ekitaldiak antolatzera bideratuko dira, eta gainontzeko seiak Getxo Kirolak erakunde autonomoaren ohiko jarduerarako aurrekontuari dagozkio. Landak nabarmendu duenez, “kirol azpiegiturak konpondu eta hobetuz, getxotar guztiek kirola egin dezaten ahalbidetzea eta ia kirol modalitate guztietan eskola kirolaren eta oinarrizkoa den federatuaren sustapena dira, 2009rako Kirol Arloak dituen ardatz nagusienak”. Argazkian, orain gutxi, Algortako Bolua 3 futbol zelaiko tribuna estaltzeko egitasmoa aurkeztu zuten Imanol Landa alkateak eta Alvaro Gonzalez Kirol zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun