Hitzaldien bidez kirola eta euskara uztartuko dituzte datorren astean Algortan

Gehitu Kirolera egitasmoaren barruan, bi hitzaldi antolatu dituzte datorren asterako Getxoko Udalaren Euskara Zerbitzua eta Bizarra Lepoan euskara elkarteak. "Kirolari gazteak: nola elikatu?" izenburupean, Josean Lekue Athletic-eko medikuak hartuko du hitza astearteko saioan. Irati Anda eskalatzailea izango da gonbidatutako kirolaria. Asteazkenean, berriz, "Eskola-Kirola, lehiatzeko edo jolasteko?" du izenburu Izaskun Azpillaga Jarduera Fisikoan eta Kirol Zientzietan lizentziadunak eskainiko duen hitzaldiak. Egun Eibar futbol taldean jokatzen duen Roberto Martinez "Tiko" Athletic-eko jokalari ohia gonbidatu dute saiora. Hitzaldi biak 19:30ean izango dira Algortako Villamonte kaleko kultur etxean. Xabier Usabiaga ETBko kazetaria ibiliko da aurkezle lanetan. Argazkian, Gehitu Kirolera egitasmoaren barruan euskarazko entrenamenduak ematen ari da Koikili Lertxundi Athleticen jokalaria.