Orain dela bi aste A gripearen beste kasu bat jazo zen Urdaibaiko udalekuetan. Bertako begirale bat gaixotu zen eta Galdakaoko ospitalera eraman zutenean kutsatuta zegoela konturatu ziren. Uribe Kostakoetan ez bezala, udaleku horietako beste inor ez zen kutsatu. Pasa den ekainaren 27an 29 urteko begirale madrildarrari sendagiria eman zioten. Hango udalekuetan 6 eta 16 urte bitarteko 40 ume zeuden eta bukatu arte egin zituzten udalekuak.
Osasun Sailak emandako aholkuak:
A zein beste edozein gripearen aurkako neurriak erabiltzea aholkatu du Eusko jaurlaritzako Osasun eta Kontsumo Sailak:
1.- Sukarra eta ondoeza orokorra izatekotan, etxean gelditu beharra dago, gaixotasuna gainditzeko eta lanean zein eskolan beste pertsona batzuk ez kutsatzeko lagungarria izango baita.
2.- Buruko mina edota sukarrerako analgesiko eta antitermikoak har daitezke.
3.- Inoiz ez da antibiotikorik hartu behar norberaren kontura. Soilik medikuak agindu eta dagokion errezeta eman badu.
4.- Gaixotasun kronikoren bat izatekotan, haurdun egotekotan, edo ume txikiak direnean medikuarengana jo beharra dago.
5.- Horrezaz gain, ohiko arau higienikoak erabili behar dira: erabilpen bakarreko zapiak erabili, ez kutsatzeko eskuak maiztasunez garbitzea, eztulka edo doministiku egitean sudurra eta ahoa estaltzea. Era berean, erretzea eta alkoholdun edariak hartzea ez da komenigarria.
Uribe Kostako udaleku itxi batean 18 ume eta gaztetxo arinki kaltetu ditu A/H1N1 gripeak. Eusko Jaurlaritzako Osasun eta Kontsumo Sailak zabaldu duenez, sintomak dituzten gaztetxoek 11 eta 15 urte bitartekoak dira. Guztira, izena eman ez duten udalekuan 61 haur eta 7 begirale daude. Dagoeneko Osasun Publikoko eta Epidemiologiako adituek arreta medikua eman diete kaltetuei, eta haurrak hobera egiten ari dira. Lehenengo gaixotze kasua pasa den ekainaren 30ean gertatu zen eta hortik aurrera beste umeak eri jartzen hasi ziren. Orduan, begirale eta arduradunek susmo txarra hartu zioten egoerari eta osasun aginteari eman zioten kasuaren berri. Sukarra, nekea, eztarriko mina eta eztula dira gaixotasunaren zantzuak. Osasun Sailak lasaitasunez jokatzeko eskatu du eta Osakidetza pandemiari erantzuteko prest dagoela azpimarratu du. Izan ere, datozen hileotan kasu kopurua biderkatu daitekeelakoan daude adituak. Halere, ez beldurtzeko eskatu dute "egoera ez delako orain dela hile batzuk baino larriagoa". Ohiko gripeak beste birulentzia dauka eta hoberako bilakaera dauka. Argazkian, aurreko urteotako udaleku baten artxiboko irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun