Jon Iturregi, Asier Pomposo, Janire Sanchez, Alana Rawlins, Karen Burgos, Leire Alberdi, Alberto Gonzalez, Ana Garamendi, Laura Alcalde, Ainhoa Zamorano, Koro Euba, Belen Lugaresaresti eta Sofia de la Peñak kudeatuko dituzte aurten Getxo udalerriko hainbat lekutan kokatu diren 15 Gazte Informazio Guneak (GIG). Aurreko urteetan jarritako panelei beste bi gehitu zaizkie aurten: bata, Algortako kultur etxean, Villamonten; eta bestea, Getxoko Andra Mari kiroldegian. Azken hori, estalkia berritzeko lanak bukatu eta gero ipiniko dute, udal iturriek zehaztu dutenez. Paneletan gaika erakusten da informazioa (lana, lanerako prestakuntza, bekak eta sariak, aisialdia, gazteentzako iragarkiak…). Aukeratutako neska-mutilek astero joan beharko dute Gazte Bulegora, dagozkien informazioa jasotzera eta, hurrengo egunean, euren paneletan ordenatuta ipini eta zahartuta geratu diren informazioak kendu beharko dituzte. Lan horren truke bekak jasoko dituzte, 445 eta 665 euro bitartekoak. Argazkian, gazte informaziorako panelak kudeatuko dituzten neska-mutilak.
Arestian aipatutako bi tokiez gain, Julio Caro Baroja, Aixerrota eta Fadura institutuetan, Azkorri eta Nuestra Señora de Europa ikastetxetan, San Nikolas Ikastolan, Getxo-Leioako LHIn, “Familia eta Gazteria” programaren lokalean, Fadura kiroldegian eta Tangora Etxean dagoen Gazte Bulegoan izango dira panelak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun