Goizeko 11:30ean hasi zen lehen lasterketa, txikienen lasterketa, neskak eta mutilak batera, zirkuituaren 630 metroko zatia eginez. Denera 89 umek parte hartu zuten. Krosa Algortako erdigunetik egin zen: Basagoiti etorbidetik, Etxeandia apezpikuaren kaleraino; handik Artibai eta Gazteluzarra kaleetatik Gobelena eta Abasota kaleetara; eta hortik aurrera berriro ere Basagoiti Etorbidera. "Horri esker, beren beregi lasterketa ikustera joandako lagunez gain, beste asko begira gertatzen dira, kalez kale beren eginkizunak betetzen ari direnean (paseatu, mezatara joan, erosketak egitera irten…)", Itxartukoek aipatu dutenez.
Opari eta sariak
Ohiturari jarraituz, korrikalari txikien lasterketetan, haur mailakoetaraino alegia, ez da sailkapenik egoten eta guzti-guztiei oparitxoa ematen zaie. Kadeteen mailatik aurrera, ordea, garaikurrak (ikusi irabazleen zerrenda) banatzen dira. Antolatzaileek nabarmendu dutenez, "oso ona" izan zen opari eta sari banaketa eta aurreko zein ondorengo giroa. "Korrikalariek eta laguntzaileek oso pozik zeuden antolatzaileekin eta hauek oso eskertuta zeuden babesleekin", azaldu dutenez. Hemendik bi urtetara kros horrek bere zilarrezko estaiak ospatuko ditu. "Oso herrikoia izan da orain arte eta bere 25. urtean ere halaxe izaten jarraitu nahi du, baina ospakizunak beti ospakizun, zerbait berezia antolatu behar dugula uste dugu", gaineratu dutenez.
Urtarrilaren 25ean, izandako haizete eta euriteengatik atzeratu behar izan zuen Algortako 23. Krosa Itxartu kultur taldeak. Herenegun, baina, primerako eguraldia izan zuten; "oso eguzkitsua, baina aldi berean hotz samara, oso egokia korrikalarientzako", antolatzaileek zehaztu dutenez. Hala ere, aitortu dutenez, data aldaketak, asteburu honetan zubia izateak eta beste tokiren batean ere krosa egon izanak "kalte" egin dio partaidetzari eta espero zituzten 350 korrikalarien ordez, 276 izan dituzte. "Hala ere kopuru polita", Itxartuko kideek aipatu dutenez. Argazkian, txikienak irteteko prest.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun