Algortako Amnistia tabernan 80 lagun inguruk harrera beroa egin diote Ibai Egurrolari. Lagunak agurtu, loreak eskaini, aurreskua, bertso bat eta Amnistiaren Aldeko Mugimenduaren eta bertan zeuden guztien izenean batek agurtu ondoren, kartzelatik atera berri den gazteak berak eskerrak eman dizkie bertan zeuden guztiei eta bera eta etxekoak lagundu dituztenei. Barruan gelditu direnak gogorarazi ditu, eta aipatu du atzo goizean Algortakoa ere den Joseba Elorriagarekin gimnasia egin eta arratsaldera arte ez zuela izan kaleratzeko abisua. Irtetea ere "gogorra" egin zaiola esan du eta denak animatu zituen aurrera segitzeko. Gero, tabernako argazkia kendu, brindisa egin eta Amets Ladislaoren zain gelditu da lagunekin batera.
Ordu bete geroago
Amets Ladislao ordu bat beranduago edo iritsi da, bere bila joandako etxekoen eta lagunekin batera. Ordurako ehun bat lagun bilduta zeuden tabernaren atarian bere zain, Leioako lagunak Guti etxean utzi eta bertara joan dira-eta. Egurrola eta Ladislao biak batera izateak are hunkigarriago egin du berari eskainitako harrera beroa. Lagunak agurtu eta Ibairekin egindako zeremonia guztia errepikatu da, baina kasu honetan, Ametsen pozerako, Ibaik berak eman dizkio loreak. Gero aurreskua, bertsoa, eta agurraren ostean, neskak ere eskerrak eman dizkie bertan bildutakoei, presoak gogorarazi ditu eta "horiek guztiak kaleratzeko lan handia egin beharko dugula" esan eta jendea animatu du lanean jarraitzeko. Argazkia kendu, brindisa egin eta poza eta algaren artean pixkana-pixkanaka jendea erretiratzen joan da…
Entzun (mp3) Kurkudi tabernan Gutiri eskainitako bertsoak, Koska irratiak hartutakoak.
Goizaldean iritsi dira etxera Ibai Egurrola, Xabier Gutierrez eta Amets Ladislao
Espetxetik atzo iluntzean atera ostean, goizaldeko 1:30ak aldera iritsi dira Leioako gasolindegira Ibai Egurrola eta Xabier Gutierrez "Guti", bidean elkartu ondoren, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Bertan ziren lagunak agurtu ostean, bakoitzak bere herrira jo du: Gutierrezek Leiora, Kurkudi tabernan zain zituen herritarren harrera jasotzeko eta Egurrolak Algortara, herriko sarreran, "ertzainek ere euren motako harrera egiteko Euskal Herria kalean jarritako kontrolean gelditu egin dutelarik", AAMk salatu duenez. Ladislao ordu bat beranduago edo iritsi da Algortara, bere bila joandako etxekoen eta lagunekin batera. Ordurako ehun bat lagun bilduta zeuden Amnistia tabernaren atarian bere zain, Leioako lagunak Guti etxean utzi eta bertara joan dira-eta. Gaur, Iker Rodrigo lutxanarra eta Eli Zubiaga algortarra ere kaleratuko dira, 6.000 euroko fidantza ordaindu ondoren. Arratsaldean kaleratzea espero da, eta ateratzen diren orduaren arabera iritsiko dira herrira. Argazkian, Ibai Egurrola eta Amets Ladislao biak batera izateak are hunkigarriago egin du berari eskainitako harrera beroa / Etengabe. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun