Goizeko 10etan etxekoek 6.000 euroko fidantza ordaindu eta eguerdiko ordu bietan irten da Kordobako espetxetik Eli Zubiaga algortarra. Uribe Kostako Amnistiaren Aldeko Mugimenduak Etengabe bitakoraren bitartez zabaldu duenez, "orain Algortarako bidean dago Eli, eta 23:00ak aldera iritsiko dela espero da". Iker Rodrigo erandioztarra ere etxerako bidean ei dago, Toledo aldeko Ocaña II espetxea utzi eta gero. Koska irratiko "Ukberri" magazinak zabaldu duenez, dagoeneko zabaldu dituzte Lutxanan jaio eta Itzubaltzeta / Romon bizi den lagunari lehenengo harrera egiteko hitzorduak: batetik, 18:00etan, Altzagan; eta bestetik, 19:30ean, Itzubaltzetako Branka herriko tabernaren aurrean. Bitartean, Bilboko Branka webguneak jakinarazi duenez, iluntzeko zortzietan eskainiko diote lehenengo harrera Arantza Urkaregi EHUko irakasleari, Zazpi Kaleetan. Argazkian, Eli Zubiaga, Iker Rodrigo eta gainontzeko sei lagunen askatasuna aldarrikatzeko manifestazioa Algortan.
Agerkari digital horren arabera, Urkaregik atzo arratsaldean atera zen Pontevedrako A Lamako espetxetik. Senideak bere bila abiatu ziren, baina gaur hartu dute Euskal Herrirako bidea. Zubiaga, Rodrigo, Urkaregi eta beste bost lagun urtarrilaren 23an atxilotu zituen Espainiako Poliziak, D3Mren aurkako operazioan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun