GALek eraildako Xabier Galdeano eta ETAren 15 biktima omendu nahi ditu Getxoko Udalak
2009ko mar. 25a, 20:20
Getxoko Udalaren Bozeramaileek Batzordeak "terrorismoaren biktimak" omentzeko hitzarmena adostu berri du. Hasteko, ostiral honetako udal batzarrean, adierazpen instituzionala (pdf) onartuko dute aho batez EAJk, PPk, PSE-EEk eta Ezker Batuak. Bestalde, udalerriko leku esanguratsu eta publiko batean oroigarria jarriko dute aurtengo azken hiruhilekoan eta urtero izango da omenaldi ekitaldia. Hala eta guztiz ere, lehenengo eta behin jakin nahi dute zer deritzoten ekimenari biktimen senitartekoek. 1970 urteaz geroztik, ETAk Getxo udalerrian egindako atentatuetan edo getxoztarrak izanik herritik kanpo hildako 15 pertsonez osaturiko zerrendarekin lanean ari dira udal agintariak. Horretaz gain, astelehen honetan 24 urte, GALek Donibane Lohizunen erail zuen Xabier Galdeano algortarra omentzeko asmoa daukate. Zerrenda horretan ez dituzte aintzat hartu, besteak beste, 1973an poliziarekin izandako tiroketan Algortan zauritu eta Basurtun hildako Eustakio Mendizabal "Txikia"; urte berean, Itzubaltzeta / Romon Iberdueroren aurkako bonba jartzen ari zirela zendutako Amezketako Jon Etxeberria Sagastume “Beltza” eta Laudioko Jon Pagazaurtundua Isusi “Pagaza”; Baionan hil zen Aitor Elortza Unanue iheslari politiko algortarra; edota, erbestean, Venezuelan bizia galdu zuen Luis Maria Zuluaga "Zulu" errefuxiatua, Itzubaltzetan tabernari izandakoa. Argazkian, alderdi guzti horietako bozeramaileez gain, Eusko Jaurlaritzaren Terrorismoaren Biktimei Laguntzeko Zuzendaritzako buru Maixabel Lasak lagunduta egin du agerraldia Imanol Landa alkateak. Udal talde politiko guztien "konpromiso lana" goraipatu eta gero, Imanol Landa alkateak nabarmendu du “akordio hau ez dugula bide luze baten abiaburua baizik, oraino ibiltzen hasi gabea dela, zeren terrorismoaren biktimei zor zaien ezagutza eta esker ona ikaragarria baita; zor historiko hori kontuan hartzekoa dugu, beraz, eta dagokigun aldetik kitatu nahi eta behar dugu”. Bitartean, Maixabel Lasa Eusko Jaurlaritzako Terrorismoaren Biktimei laguntzeko zuzendaritzako arduradunak "poztasun handiz" hartu du Getxo udalerrian, "sufrimendu handia pilatu duen udalerrian", hartutako akordioa. “Getxo da gaur euskal politikan terrorismoaren biktimei lotutako irudia eta sinboloa; inoiz eztabaida alderdikoi eta polemika iturri izan behar ez zuen gai baten inguruko akordioa eta adostasunerako borondatea ezaugarriak dituen garai berria. Biktimen arazoak aipatzeko eztabaida publikoan eta politikoan lasaitasun giroa zabaltzen ari da eta beraien oroimenak behingoz bere tokia du herri honen bizitza publikoan. Getxoko mota honetako ekimenak duin bihurtzen du Udala eta iraganarekin kontuak ordaintzeko balio du, baita orainaldian hildako auzokideen errugabetasuna eta beren oroimena edozeinen kontra gordetzeko promesa ozen aldarrikatzeko ere", azaldu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun