Bilgune Feministaren ustez, hezkuntza jorratu behar da hezkidetza landuz, baina prebentzioa ere landu behar da. "Berdintasunaren belaunaldia garela esaten dute, baina 17 urteko mutilak ere badira gaur egun nesken aurka bortxakeria erabiliz", salatu dutenez. Euren hitzetan, komunikabideek ere pisu handia daukate, baina "prebentzioa da garrantzitsuena". "Milaka mekanismo aktibatu daitezke", azpimarratu dutenez.
Izaskun Jimenezen erailketa dela eta, Bilgune Feministaren irakurketa:
Denon ardura da indarkeria sexistarekin amaitzea!
Euskal Herriko Bilgune Feministak gogorki salatu nahi du aste honetan Gernikan jazotako erailketa. Emakumeon kontrako indarkeria sexuen arteko hierarkian oinarritutako sistema sozialaren beste adierazgarri bat da. Beraz, sistema sozialean aldaketa sakonak egin eta honek dakartzan sexuen arteko desberdintasunekin amaitu ezean erailketak egoten jarraituko dute.
Lan honetan instituzioek ardura handia dute, momentuz era integralean betetzen ari ez diren ardura. Baina herritarrok ere, emakume eta gizonek, eginbehar handia dugu gure egunerokotasunean honekin amaitzeko, harreman parekideak eraikitzeko.
Horregatik, Emakumeen Mundu Martxako Plataformak deitutako kontzentrazioetan parte hartzeko deia luzatu nahi diegu guztiei.
Denon ardura da indarkeria sexistarekin amaitzea!
Salatu dezagun kalean Izaskun Jimenezen erailketa!
Bihar, ostirala 27, 19:30ean kontzentrazioa Telletxen.
Euskal Herriko Bilgune Feminista:
http://www.bilgunefeminista.org
Izaskun Jimenezen erailketa salatuko dute bihar Algortan
2009ko mar. 26a, 16:01
Emakumeen Mundu Martxako Plataformak deituta, ostiral honetan, martxoak 27, elkarretaratzea egingo dute Algortan, Izaskun Jimenezen erailketa salatzeko. Hitzordua 19:30ean jarri dute, Telletxe plazan. Koska irratiko "Ukberri" magazinean egindako elkarrizketan, indarkeria sexista "arazo estrukturala" dela adierazi du Bilgune Feministako kide batek. "Nahiz eta leku askotan ez onartu, gauzak errotik aldatzen ez badira, bere horretan jarraituko dute botere harreman horiek sexu harremanetan eta emakumeen aurkako bortxakeria ere bere horretan jarraituko du", azaldu duenez. Hartara, horrelako egoerei aurre hartzeak daukan garrantzia azpimarratu dute feministek. Ustez bere senarrak erail zuen Gernika-Lumon astelehen gauean Izaskun Jimenez. Gizonak ere zauritu ei zuen labanaz 19 urteko alaba. Neskaren egoera onera egin duela jakinarazi dute. Argazkian, Clara Rangelen erailketa salatzeko abenduaren 30ean Algortan egindako kontzentrazioa.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun