Korrika igaro aurretik eta ondoren ospakizunak izango dira Algortan eta Itzubaltzetan
2009ko mar. 26a, 18:25
Gaur Tuteratik abiatuko den Korrika 16 apirilaren 3an, ostiralarekin, helduko da Getxo udalerrira -Berangotik etorri eta Salsidu kaletik sartuko da Algortara-, 16:10ak aldera. Hori dela eta, arratsalde horretan jaia egingo dute Itzubaltzeta / Romoko Santa Eugenia plazan, AEKk, Alfabetatze Euskalduntze Koordinakundeak antolatzen duen euskararen aldeko lasterketa igaro ostean. Besteak beste, umeentzako euskaraokea izango da bertan, 18:00etatik aurrera, Txatxilipurdi taldearen eskutik. Ordu eta erdi beranduago, berriz, Tor magoak eskainiko du ikuskizuna. Eta 20:30etik aurrera, Lisker taldeak girotutako dantzaldia egingo dute. Bestalde, Korrika kulturala dela eta, udalerrian antolatutako ekitaldiei dagokienez, ostegunean, apirilak 2, "Hudaltzainak" ikuskizuna izango da Algortako The Piper´s taberna irlandarrean, 20:00etan. Ekitaldiotarako 6.000 euroko diru laguntza eman du Getxoko Udalak. Argazkian, Asier Hormaza bera The Piper's-en ikusgai egongo den "Looking for Mister X" film laburrean."Hudaltzainak" ikuskizuna anitza da: hiru film labur aurkeztuko baitituzte, besteak beste, Asier Hormaza aktore algortarra, Ander Lipus eta Porrotx pailazoaren partaidetzarekin. Horrekin batera, Etxahun Lekuek, Arkaitz Estiballesek eta Fredi Paya algortarrak bertsoak botako dituzte, musikariez lagunduta, baina ez ohiko doinuekin kantatuta. Musikarien buru Josu Martinez eta Txaber Fernandez dira.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun