Leioako 30 gizon inguruk parte hartu dute emakumeenganako indarkeriaren kontrako topaketan
Guztira 30 gizonek baino gehiagok, horien artean kargu politikoak, udal langileak eta jubilatuak, parte hartu zuten atzo arratsaldean Emakumeenganako Indarkeriaren Kontrako I. Topaketan. Ekitaldia 18:00etatik 21:00etara egin zen Mendibile jauregian eta, lunchaz gozatzeaz gain, gai horren inguruko iritziak elkartrukatzeko aukera eduki zuten gizonezkoek. Horretaz gain, hainbat bideo proiektatu zituzten, era didaktikoan arazo larri honen berri emateko. “Berriketan Leioan” izeneko ekintza, genero indarkeriaren kontrako aurtengo kanpainaren barruan kokatuta dago eta "udalerriko gizonak parte hartzeko gune bat antolatzea du helburu, emakumeei eragindako indarkeriari buruzko hausnarketa egin dezaten", udal iturrien arabera. Argazkian, oraindik orain gutxi dira emakumeenganako indarkeria salatzeko ekimenetara joaten diren gizonak.
Mota horretako ekintzen bitartez, herriko gizon eta mutikoen parte hartzea sustatu nahi du Leioako Udalak, jendarteari mezu argi bat helarazteko: "emakumeek ez dute bakarrik borrokatu beharrik, gizonek diskriminazio zein desberdintasun egoerak salatu egin behar dituzte", alegia. Horretan sakontzeko egin du lehenengo topaketa Berdintasun Sailak. Aurrerantzean ere ekimena antolatzen jarraitzeko asmoa dauka Leioako Udalak. "Lehen deialdi hau sekulako arrakasta izan du dagoeneko 30 gizon baino gehiago parte hartzea lortu duelako", adierazi dutenez. Atzorako gonbitea "udalerri osoak" jaso ei zuen: 11.500 gonbidapen bidali ziren etxeetara.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun