Bestalde, aho batez, eraikinetako beheko solairuetako lokalak etxebizitza bihurtzeko eta, herriko merkataritza eta ostalaritza sustatzeko asmoz, erabilera publikoko espazioetan terrazak eta barrak ipintzeko ordenantzetan sartutako neurri berriak onartu dituzte. Halaber, PPk mozio bidez proposatuta, TAO araupetzen duen ordenantza aldatzea aztertuko dute, "udalerriko behar berrietara egokitzeko". Proposamena EAJ eta EB-Berdeek babestu dute. PSE-EEk, aldiz, aurka bozkatu du.
2008ko aurrekontuaren likidazioa
Ekonomia arloko gaietan, 2008ko aurrekontu orokorraren likidazioaren berri eman da. Ogasun Saileko zinegotzi Aitor Soloetak adierazi du 2007ko hasiera bateko aurrekontua 97 milioi eurokoa izan zela. Halere, 2008ko urtea 114 milioi euroko lan kontratazio eta zerbitzuekin hasi zen eta horietatik 109 milioi esleitu ziren. Hori, aurreko urteetako soberakinei esker eta Udalak zorrik ez zuelako egin ahal izan zen. “Soberakinei esker krisialdietan lasaiago egon gaitezke, herritarrei zergak murriztu ahal diegu, eta halaxe egin dugu...”, aipatu du Soloetak. Ogasun zinegotziak esan du, behin, 2008ko aurrekontuaren likidazioa eginda, "24 milioi euro" geratzen direla "nahi den bezala erabiltzeko".
Terrorismoaren biktimen aldeko omenaldia
Horretaz gain, herenegun aurreratu bezala, aho batez onartu dute urtero "terrorismoaren biktimei" omenaldia egitea. Horren harira, ornamenturako elementuren bat ezarriko da udalerriko toki esanguratsu eta publikoren batean. ETAk Getxo udalerrian egindako atentatuetan edo getxoztarrak izanik herritik kanpo hildako 15 pertsonez osaturiko zerrendarekin lanean ari dira udal agintariak. Horretaz gain, astelehen honetan 24 urte, GALek Donibane Lohizunen erail zuen Xabier Galdeano algortarra omentzeko asmoa daukate.
Algortan antzoki berria eraikitzeko proiektuaren lehenengo fasea eta lan horiek kontratatzeko prozedura onartu ditu, gaurko osoko bilkuran, Getxoko Udalbatzak. Antzokia bera, musika eskola eta San Nikolas plaza azpiko aparkalekuak hartuko dituen zuloaren indusketari dagozkie obra horiek. Lehenengo faseak 7 milioi euroko aurrekontua du eta 2009ko amaierarako hastea espero dute, lanak bi urtez luzatuz. Ondoren, etorriko da bigarren fasea, San Nikolas plaza azpian aparkalekua egiteko; eta hirugarren bat Getxo Antzokia altxatzeko. Orotara, 30 milioi euroko inbertsioa suposatuko du antzoki berriak. Erabakia EAJ, PSE-EE eta Ezker Batuaren aldeko botoekin eta PPren abstentzioarekin hartu da. Argazkian, udal batzarra baino lehen, Algortako azokan paratutako erakusketa aurkeztu dute Luis Maria Uriarte Getxo Antzoki berriaren arkitektoak, Imanol Landa alkateak eta Joseba Arregi Hirigintza zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun