Algortako Torrene kalean dagoen azokako merkatariek euren lokaletako gune bat utzi diote Udalari Getxo Antzoki berriaren proiektuaren maketa eta irudiak ikusgai ipini ahal izateko. Erakusketa, astelehenetik ostiralera, 10:00etatik 14:00etara eta 17:00etatik 20:00etara bisitatu ahal izango da. Eta larunbatetan goizez bakarrik. Getxo Antzoki berriari dagokionez, bata bestearen ondoan egongo diren bi blokek osatuko dute. Oinarrizkoena, Telefonicak duen eraikinera egongo da erantsita. Horrek 700 lagunentzako auditorioa hartuko du. Bigarren blokean, Etxeandia Gotzaina kalean, musika eskola kokatuko dute. San Nikolas plaza azpian, berriz, parkinga egingo dute, bertan bizi direnei eta antzokiari berari zerbitzu emango diona. Andres Cortina kalean izango du sarrera horrek. Inguruetan beste aparkaleku birakari bat egingo da, eta plazan egingo diren obrek "ez dute asko eraldatuko gaur egun duen itxura", udal iturrien arabera. "Halaber, jendea biltzeko leku gisa indarra hartuko du, sarbideak hobetuko ditu eta muga arkitektonikoak gaindituko ditu", gaineratu dutenez. Argazkian, Getxo Antzoki berriaren maketa. Argazki gehiago ikusteko sakatu hemen.
Getxo Antzoki berriaren beheko solairuan egongo den ataripe batetik ailegatuko gara bi blokeetara. Bere terrazak jatetxe-kafetegia izango du. Lehenengo solairuan, entsegu aretoa eta administrazio zerbitzuak kokatuko dira. Bi eraikinen azpian musika eskolako auditorioa -250 lagunentzat-, 90 pertsonentzako konferentzia aretoa eta 285 pertsonentzako erabilera ezberdinetarako gela izango dira. Imanol Landa alkateak adierazi duenez “azpiegitura berri eta abangoardista honek berriro ipiniko du Getxo, Euskadin dagoen kalitatezko eskaintzaren buruan. Arte eszenikoetarako eta Musika Eskolarako gune berria izango da; lehen mailako azpiegitura udalerriko kultur egitarau prestigiotsua bultzatuko duena, Euskalduna Jauregiarekin eta Bilborekin lehian sartzeko ahalbideratuko duena, eta getxotarren eta udalerriko elkarteen nahiei erantzuna emango diena". Abra ere ikusi ahal izango da atzealdeko leihatetik. “Ekimenak aberastasuna ere sortzen lagunduko du”, esan du Landak, “hala nola enpresekin, aisialdiarekin edo zerbitzuekin lotutako egitasmoak". "Dudarik gabe jarduera ekonomikoa sustatuko du eta udalerriarentzat onuragarriak izango diren sinergia ekonomikoak bultzatuko ditu", gaineratu duenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun